Á fundinum verður unnið með hugmyndafræði íbúaþinga Brothættra byggða, sem margir íbúar á Austurlandi þekkja, til að fá fram hugmyndir og markmið heimamanna á Úthéraði um þau tækifæri og möguleika sem svæðið býr yfir.

Fundurinn er liður í nýju byggðaverkefni á Úthéraði sem kemur í beinu framhaldi af öðru verkefni, sem lauk í apríl á þessu ári, en það var unnið á grunni svonefndrar byggðaáætlunar sem lýsir stefnu ríkisins í byggðamálum og markmið þess verkefnis var m.a. að skoða möguleika á friðlýsingu svæðisins.

Verkefnahópur hefur verið myndaður um þetta nýja verkefni og í honum eru fulltrúar heimamanna. Þá var ákveðið í vor að vinna með Austurbrú og starfa Jóna Árný Þórðardóttir, framkvæmdastjóri, og Tinna Halldórsdóttir, yfirverkefnastjóri innri mála og rannsókna, þétt saman með hópnum.

Verkefnahópurinn hefur fundað fjórum sinnum og auk skipulagningar á íbúaþinginu hefur hópurinn lagt fyrir spurningakönnun til að fá fram viðhorf íbúa til ýmissa þátta s.s. þjónustu, innviða, málefna sem hafa verið í umræðu varðandi svæðið og þá ímynd sem einkennir það. Hana má taka hér.

Verkefnið nýtur stuðnings sveitarfélagsins Múlaþings sem styrkir verkefnið um þrjár milljónir króna. Verkefnastjórnin hvetur fólk til að mæta á fundinn og leggja sitt lóð á vogarskálarnar enda eru möguleikar svæðisins miklir.

Til að auðvelda skipulag hvetjum við áhugasama að skrá sig á fundinn en allir heimamenn og/eða jarðeigendur á Úthéraði eru velkomnir. Það má skrá sig með því að senda tölvupóst á [email protected] eða með því að smella hér.