Í haust verður blásið til matarveislu á Austurlandi þegar Austurbrú tekur höndum saman með matreiðslumönnum og framleiðendum til að vekja athygli á austfirsku hráefni og austfirskum matarhefðum. Alls verða haldnir fjórir viðburðir, sá fyrsti á morgun laugardag en þá munu húsráðendur í Vallanesi halda kartöfluveislu.
Verkefnið Matarauður Austurlands snýr að því að vekja athygli á austfirsku hráefni, austfirskum matarhefðum og tengir saman framleiðendur og söluaðila á svæðinu. Lögð er áhersla á hreinleika og ferskleika hráefnis, hollustu, einfaldleika og að maturinn sem á borð er borinn beri vitni um líðandi árstíð. Í haust verður því blásið til matarveislu með fjórum mismunandi matarupplifunarviðburðum.
Móðir Jörð og Matarauður Austurlands blása til fyrsta viðburðarins á morgun laugardag (3. október) í Vallanesi en þá munu húsráðendur halda kartöfluveislu þar sem Kári Þorsteinsson, matreiðslumaður á Nielsen Restaurant á Egilsstöðum, mun töfra fram kartöflurétti; frá forrétti til eftirréttar.
Auk þess verður ræktunarsagan rakin og gestum boðið að gæða sér á fjölda kartöfluafbrigða sem nú eru ræktuð á þessum sama stað og fyrir 268 árum. Upphaf grænmetisræktunar í Vallanesi er rakið til ársins 1752 þegar Páll Guðmundsson aðstoðarprestur í Vallanesi setti niður kartöflur og kál á Pálshúshól.
Í stuttu máli: Allt sem þú vildir vita um kartöflur, allt sem hægt er að gera við kartöflur, hvernig fer matargerðarlistin með þessi „nýju“ afbrigði af kartöflum?
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn