Síðustu mánuði hefur Austurbrú unnið að þróun smáforrits sem kallast LÍSA. Það auðveldar innflytjendum að læra íslensku hvar og hvenær sem er og styður við Heimsmarkmið Sameinuðu þjóðanna um menntun fyrir alla og að skapa jöfn tækifæri fyrir innflytjendur til þátttöku í íslensku samfélagi. Þetta er metnaðarfullt verkefni sem krefst mikillar sérþekkingar.
Kennsluforritið LÍSA kallar á samstarfsaðila í fremstu röð
Eins og við höfum greint frá fékk Austurbrú nýverið veglegan styrk úr Tækniþróunarsjóði fyrir áframhaldandi vinnu við gerð smáforritsins LÍSU en von okkar er að það muni gerbreyta aðgengi útlendinga að íslenskunámi. Þetta er metnaðarfullt og að sama skapi flókið verkefni og við höfum verið einstaklega heppin með samstarfsaðila. Annars vegar MIÐEIND, sem er leiðandi fyrirtæki á sviði máltækni og gervigreindar, og hins vegar hugbúnaðarfyrirtækið STOKKUR sem er í fremtu röð á sínu sviði. Við erum stolt af þessu samstarfi og viljum kynna þessa félaga okkar fyrir áhugasömum og við byrjum á Stokki.
Hugbúnaðarfyrirtækið Stokkur hefur hannað yfir sextíu smáforrit frá því að það hóf starfsemi fyrir fimmtán árum síðan. Mörg þeirra eru raunar vel þekkt og eflaust hafa lesendur notað sum þeirra. Má þar nefna smáforritin Aur, Domino’s, Lengjan, Lottó og Alfreð.
Stokkur leggur áherslu á aðgengi og einfaldleika í sinni hönnun. Það eru eiginleikar sem við viljum einmitt að einkenni LÍSU. Við leituðum til fyrirtækisins í þeim tilgangi að sjá hvernig við gætum rammað verkefnið inn og tekið næstu skref með LÍSU sem hafði verið á teikniborðinu hjá okkur um þó nokkurt skeið.
Keyrum verkefnið áfram
Árdís Björk Jónsdóttir og Helga Lóa Kristjánsdóttir eru okkar helstu samstarfsmenn hjá Stokki. Helga Lóa er verkefnastjóri fyrirtækisins og tölvunarfræðingur að mennt. Hún hefur lengst af starfað sem forritari og vefstjóri. Árdís er framkvæmdastjóri Stokks og hefur starfað í yfir tuttugu ár að ýmis konar tæknimálum, oftast í þróunarverkefnum.
Þau segja sitt hlutverk í LÍSU fyrst um sinn hafa verið að stýra „hönnunarspretti“ en þá er viðskiptavini, í þessu tilfelli Austurbrú, hjálpað að taka mikilvægar ákvarðanir á eins skömmum tíma og mögulegt er. Þetta snýr að hugmyndavinnu, fyrirhugaðri virkni forritsins, forgangsröðun, hönnun og ýmsu öðru. Oft tekur vinna af þessu tagi langan tíma en fyrirtækið vinnur eftir verklagi frá Google sem styttir ferlið umtalsvert og þess vegna er talað um „sprett“ í þessu samhengi.
„Við nálgumst þetta verkefni eins og önnur sem koma til okkar,“ segir Árdís. „Fyrst að leiða hönnunarsprettinn og svo er okkar hlutverk að tryggja sameiginlegan skilning og keyra verkefnið áfram þegar ákvarðanir hafa verið teknar hjá Austurbrú.“
Kennslureynsla Austurbrúar skiptir máli
Þær segja að verkefnið LÍSA hafi strax vakið athygli þeirra. „Frá fyrsta fundi með Austurbrú fundum við kraftinn frá hópnum og ástríðuna fyrir verkefninu,“ segir Helga Lóa. „Fyrir okkur er það besta uppskriftin að góðri lausn. Þetta tiltekna verkefni er mjög spennandi, svo og samstarfið við Miðeind með sínar máltæknilausnir og fyrirhugaðri raddsöfnun. Það er alltaf mest gaman að vinna að nýjum lausnum,“ segir hún.
Aðspurð um þýðingu verkefnisins segir Árdís hana skýra. „Það er þýðingarmikið að nýta tæknilausnir í svona verkefni og byggja þær frekar upp s.b. samstarfið við Miðeind. Þá skiptir líka máli að þessi lausn, sem er að verða til, er fagleg og reist á margra ára reynslu Austurbrúar af íslenskukennslu sem svo aftur byggir á evrópska tungumálarammanum. Saman tryggir þetta þeim mun gagnlegri lausn sem vonandi mun nýtast nýjum íbúum landsins að læra þetta krefjandi tungumál!“
Helstu upplýsingar um LÍSU.
Nánari upplýsingar
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
