Í byrjun júní höfðu 404 próf verið þreytt á starfsstöðvum Austurbrúar frá áramótum en próftakan er liður í þjónustu okkar við háskólanemendur. Flest prófin, tæpur helmingur, voru tekin á Egilsstöðum og rúmlega helmingur prófanna voru við Háskólann á Akureyri. Konur eru í miklum meirihluta próftaka eða um 70 prósent. 

Þjónusta við háskólanemendur er mikilvægur liður í starfsemi Austurbrúar. Háskólanemar á svæðinu geta tekið próf hjá okkur auk þess sem þeir geta sótt ýmsa aðra þjónustu og aðstoð hjá stofnuninni.

Próftakan og prófaumsýsla er þó líkast til stærsti þátturinn í þjónustunni og sá mikilvægasti eftir að fjarfundakennslu frá háskólunum var að mestu hætt enda hefur ný tækni leyst af hólmi gömlu fjarfundabúnaðina sem finna mátti á öllum starfsstöðvum Austurbrúar fyrir ekki svo löngu síðan.

Alls voru tekin 404 próf í vor af 167 nemendum. Flest prófin voru tekin á Egilsstöðum (185), næst flest á Reyðarfirði (125), en færri voru tekin annars staðar. Flest prófin voru við Háskólann á Akureyri, rúmlega helmingur, en hlutur HA hefur verið mjög stór á síðustu árum og greinilegt að skólinn er vinsæll meðal háskólanemenda á Austurlandi.

Það vekur athygli að mikill meirihluti þeirra sem taka próf hjá okkur eru konur en af 167 nemendum sem tóku próf í lok vorannar voru 112 konur – um 70 prósent – og karlar aðeins 55. Ýmsar ástæður eru fyrir þessu en nokkrar ef til vill augljósari en aðrar. Tinna Halldórsdóttir, félagsfræðingur og verkefnastjóri hjá Austurbrú, segir megin skýringuna þá að námsframboð háskólanna hafi ætíð einkennst af greinum sem fram til þessa hafi verið vinsælli hjá konum en körlum og þess vegna hafi hlutföllin alltaf verið svona ójöfn: „Ég á við ýmis heilbrigðisvísindi og kennaranám,“ segir hún og bætir við: „Eina fagið á seinni árum þar sem karlar voru í meirihluta var tölvunarfræði sem Háskólinn í Reykjavík bauð upp á.“

Fyrir þá sem áhuga hafa er rétt að benda á úttekt sem Austurbrú gerði fyrir Samband sveitarfélaga á Austurlandi um fjarnám og fjarnemendur í fjórðungnum en þar kemur m.a. fram að framboð á fögum í háskólanámi með fjarnámssniði hefur haldist nokkurn veginn óbreytt undanfarin 10 ár og ekki margt sem bendir til að breytingar séu að verða á því.

Skýrslu um úttektina má finna hér.