Viltu fjölga gæðastundunum?
„Það er stækkandi hópur fólks sem nýtir sér sveigjanleika vinnunnar til að kynnast nýjum stöðum. Lífsgæði, sem við á landsbyggðinni teljum sjálfsögð, eru það svo sannarlega ekki ef við berum okkur saman við þéttbýlli og fjölmennari samfélög. Landsbyggðin er t.d. kjörin fyrir ungar fjölskyldur þar sem hver samverustund barns og foreldris er dýrmæt.“ – Halldóra Dröfn Hafþórsdóttir, verkefnastjóri hjá Austurbrú.
Kortlagning á húsnæði fyrir staðsetningarlaus störf
Eftir heimsfaraldurinn var ljóst að ýmsum störfum mátti sinna nánast hvar og hvenær sem er. Óstaðbundin störf eru reglulega auglýst og sífellt fleiri sjá tækifæri í því að breyta um umhverfi og prófa eitthvað nýtt. Austurbrú opnaði nýverið vef þar sem kortlagt er húsnæði í landshlutanum sem hentar vel fyrir fólk í óstaðbundnum störfum.
Meiri þörf fyrir fjarvinnu
Á tímum heimsfaraldursins breyttist starfs- og námsumhverfi margra í takt við öra tækniþróun og þörf fyrir meiri fjarvinnu- og nám. „Störf sem byggja á hugviti má sinna nánast hvar sem og/eða hvenær sem er,“ segir Halldóra Dröfn Hafþórsdóttir, verkefnastjóri hjá Austurbrú. „Það er stækkandi hópur fólks sem nýtir sér sveigjanleika vinnunnar til að kynnast nýjum stöðum. Lífsgæði, sem við á landsbyggðinni teljum sjálfsögð, eru það svo sannarlega ekki ef við berum okkur saman við þéttbýlli og fjölmennari samfélög. Landsbyggðin er t.d. kjörin fyrir ungar fjölskyldur þar sem hver samverustund barns og foreldris er dýrmæt.“ Markmið vefjarins er að taka saman þau tækifæri sem bjóðast þegar kemur að starfsaðstöðu á Austurlandi og bjóða þannig fólki í staðsetningarlausum störfum húsnæði við hæfi.
Vildi breyta til
Jóhann Þorsteinn Þórðarson, hugbúnaðarsérfræðingur hjá Origo, vinnur í samvinnuhúsinu Múlanum í Neskaupstað sem vígður var formlega sl. sumar. Hann hefur verið fjarvinnandi í tuttugu ár og prófað ýmislegt þegar kemur að slíku vinnufyrirkomulagi en segir að fyrirkomulag samvinnurýmisins henti sér best. „Ég byrjaði í fjarvinnu árið 2001,“ segir hann. „Ég bjó í Reykjavík, átti unga fjölskyldu og mig langaði að breyta til. Mér tókst að sannfæra yfirmanninn um að leyfa mér að prófa þetta og það þótti óvenjulegt á þessum tíma enda virkuðu kerfin ekki eins og þau gera í dag þegar það skiptir í raun engu máli hvar þú sinnir starfinu.“ Jóhann er Norðfirðingur í húð og hár. Hann vissi vel af kostum þess að búa í litlu samfélagi með ung börn. „Þegar ég flutti austur var breytingin sú að ég eignaðist aftur tíma. Það bættust einfaldlega tvær klukkustundir við daginn að jafnaði. Ég þurfti ekki lengur að keyra í reykvísku umferðinni í leikskólann og þaðan í vinnu sem var einhvers staðar annars staðar í borginni. Allt í einu átti ég tíma eftir vinnu sem ég hafði ekki átt áður.“
Heimsfaraldurinn breytti miklu
Jóhann segir að heimsfaraldurinn hafi breytt miklu. Skilningur stjórnenda á fjarvinnufyrirkomulaginu hafi aukist til muna og það þyki ekki orðið neitt tiltökumál að fólk fjarvinni. „Lengi vel var maður eini maðurinn á fundum sem talaði í gegnum tölvuskjá en það er orðið sífellt algengara að fundir séu teknir í gegnum Teams eða önnur sambærileg forrit þar sem allir fundarmenn eru fjarvinnandi. Sumir heima hjá sér en aðrir jafnvel bara við sitt borð á vinnustaðnum. Í dag finnst mér ég vera eins og hver annar starfsmaður Origo og þessi sveigjanleiki er orðinn hluti af vinnunni. Fólk sér að þú afkastar jafnvel meiru í fjarvinnu. En þetta fer auðvitað eftir þeim verkefnum sem þú sinnir. Það skiptir máli að viðhalda samskiptum þar sem fólk hittist augliti til auglitis og þess vegna fer ég reglulega suður til að hitta viðskiptavini og vinnufélaga.“
Sem reynslubolti í fjarvinnu hefur Jóhann prófað ýmislegt. Hann hefur unnið heima úr bílskúrnum, verið með skrifborð inni á vinnustöðum annarra fyrirtækja en það fyrirkomulag sem honum hefur fundist virka best er, líkt og áður kom fram, það sem finna má í samvinnuhúsinu Múlanum í útbæ Neskaupstaðar. Um er að ræða gamalt verslunarhúsnæði sem var endurskipulagt með þetta nýja hlutverk í huga.
Þarna er hægt að leigja vinnurými, fá aðgang að viðtalsherbergjum og fundarsölum og fjöldinn allur af fyrirtækjum hefur flutt starfsemi sína þangað. Má þar nefna t.d. Matís, Austurbrú, endurskoðunarfyrirtækið Deloitte, Matvælastofnun og mörg fleiri.
„Ég hef prófað að vinna heima hjá mér,“ segir hann. „Og það veltur á ýmsu hvort það sé hentugt. Ertu með góða aðstöðu heima hjá þér? Hvernig er fjölskyldan samsett? Ef enginn er heima milli níu og fimm ertu í sjálfu sér með allan þann vinnufrið sem þú þarft en á sama tíma er maður tiltækur í heimilisverkin. Það hefur sína kosti og galla,“ segir Jóhann og brosir út í annað.
„Þótt ég sé í fjarvinnu hjá fyrirtæki með höfuðstöðvar sínar í Reykjavík mæti ég á hverjum morgni í vinnu. Á fjölbreyttan, spennandi og skemmtilegan vinnustað þar sem ég fer í kaffi með fólki sem sinnir allt öðrum verkefnum en ég. Þótt við séum að vinna hjá ólíkum fyrirtækjum höldum við starfsmannapartí líkt og við séum ein heild og gerum eitthvað saman. Við erum öll félagsverur inn við beinið og þetta skiptir máli. Það er þessi mannlegi þáttur sem maður saknar einna helst í fjarvinnu og samvinnurými, eins og Múlinn, er kjörið fyrir fjarvinnandi fólk sem vill félagsskap.“
Afrakstur vinnunnar
Afrakstur kortlagningarinnar má finna á vefsíðunni Austurland.is. Þar er hægt að leita að hentugu húsnæði eftir byggðakjörnum og eftir tegund húsnæðis, hvort það henti fyrir skrifstofu, viðburði, verkstæði, matvælaframleiðslu o.s.frv. Þess má geta að nú stendur yfir þýðing á vefnum yfir á ensku og verður sú vinna kláruð í byrjun árs 2023 auk þess sem skoðað verður að þýða hann yfir á fleiri tungumál.
Vefur verkefnis
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
