Tæplega áttatíu prósent háskólanema í fjarnámi á Austurlandi eru konur og nær helmingur nemenda stundar nám sitt við Háskólann á Akureyri. Þetta er meðal þess sem kemur fram í samantekt Tinnu K. Halldórsdóttur, verkefnastjóra, um háskólanám á Austurlandi.

Háskólanemar sem skráðir eru sem fjarnemar hjá Austurbrú eru 132 á haustönn og eru nokkuð færri en fyrir ári síðan þegar 168 voru skráðir. Nær helmingur eða 48,5% eru í námi við HA enda góð þjónusta þar við fjarnema. Aðeins í HR eru karlar meirihluti fjarnema. Tölur vantar reyndar frá Bifröst en sl. ár hafa verið 3-7 nemar þaðan.

Konur yfir 75% háskólanema í fjarnámi

Konur hafa lengi verið fleiri en karlar í háskólanámi á Austurlandi en kynjahlutfallið á haustönn sem nú er að ljúka er það ójafnasta hingað til . Nú eru 76,5% háskólanema á Austurlandi konur. Árið áður voru konurnar 66%. Ýmsar skýringar geta verið þarna að baki en á landsvísu eru konur fleiri en karlar í háskólanámi. Önnur skýring er sú að þrátt fyrir tilraunir til að uppræta staðalmyndir um kvenna- og karlastörf er það enn almenn staðreynd að konur sækja meira í hefðbundin kvennastörf og karlar í hefðbundin karlastörf. Sú menntun sem boðið er uppá í fjarnámi er í flestum skólum menntun sem konur sækja frekar í en karlar. Sem dæmi um það er kennslufræði og skyldar greinar, hjúkrunarfræði og félagsvísindi. Greinar sem karlar sækja frekar í eru sjaldnar í boði sem fjarnám og þar virðist ein skýring liggja. Í HR er meirihluti fjarnema karla, 13 af 14, og þeir eru flestir að læra iðnfræði og tölvunarfræði. Aðrar karllægari greinar eru almennt ekki í boði í fjarnámi s.s. verkfræði og raunvísindi. 

Kennari, viðskiptafræðingur eða félagsvísindamaður?

Nemendurnir eru flestir í kennaradeild eða námi í uppeldis og menntunarfræðum s.s. sérkennslu. Bæði eru þetta nemendur í grunnnámi sem og nemendur í meistaranámi. Enginn doktorsnemi er skráður sem fjarnemi en sl. ár hafa þeir verið 1-3 á Austurlandi. Næst flestir eru í viðskiptafræði og nær allir við HA.

Staðnemendur koma heim í próf

Fjöldi lokaprófa er tekinn á starfsstöðvum Austurbrúar og eru þar bæði fjarnemendur og svo tölvuverður fjöldi nemenda sem annars er í dagskólanámi á höfuðborgarsvæðinu og jafnvel erlendis. Þessir nemendur kunna vel að meta að geta komist fyrr heim í jólafrí og taka sín próf á starfsstöðum Austurbrúar. Á Egilsstöðum eru tekin flest próf í desember eða um 200 talsins, á Reyðarfirði eru prófin um 100.

Nánari upplýsingar veitir Tinna K. Halldórsdóttir, verkefnastjóri, í síma 470 3800.