Liðsauki til Austurbrúar
Fyrr á árinu gekk til liðs við okkur Anna Sigurveig Magnúsdóttir. Hún er menntuð í tölvunarfræði og mun sinna ýmsum verkefnum hjá Austurbrú er snúa að tölvukerfum, hugbúnaði og greiningu.
Anna Sigurveig er með BS-gráðu frá HR í tölvunarfræði 2003 og meistarapróf í tölvukerfum fyrirtækja og viðskiptagreind frá Westminster University í London. Framan af vann hún þó mest við reiðmennsku og hross auk þess sem hún hefur tekið að sér ýmis þjónustustörf. Eftir nám hjá HR vann hún hjá Arionbanka í verkefnum sem tengdust viðskiptagreind, skýrslugerð, skipulagi og forritun. Þá sinnti hún verkefnastjórn hjá Krónunni þar sem hún stýrði m.a. innleiðingu á nýjum verslunarkerfum.
Hugbúnaður og verkferlar
Verkefni hennar hjá Austurbrú snúa fyrst og fremst að hugbúnaði og verkferlum honum tengdum. „Ég er að vinna í því að ná yfirsýn yfir þann hugbúnað sem Austurbrú á og notar, útbúa farveg og ferla fyrir kaup á nýjum hugbúnaði þannig að hugbúnaðarflóran okkar verði markviss og skilvirk,“ segir Anna Sigurveig.
Með ólæknandi veiðidellu
Sigurveig er 54 ára gömul, fædd og uppalin í Mosfellssveitinni en ættuð að austan og á tvö uppkomin börn. Hún er búsett á Seyðisfirði og áhugamálin hennar eru fyrst og síðast veiði. „Að búa hér fyrir austan er eins og að hafa flutt til paradísar,“ segir hún. „Aðrar dellur fara svo ágætlega saman við veiðidelluna, ferðalög innanlands, smá bíladella og að þvælast á fæti upp og út um allt og helst þangað sem enginn annar er á ferðinni. Á samt erfitt með að stunda fjallgöngur eða gönguferðir bara göngunnar vegna. Þarf að hafa einhvern tilgang í þessu labbi.“
Gamall draumur að koma austur
Anna Sigurveig segist kunna vel við sig fyrir austan. „Ég er soldið að lifa gamlan draum. Vinnan er mjög fín, nóg að gera og gaman að finnast maður vera að gera eitthvað gagn. Austurbrú er góður vinnustaður, jákvætt andrúmsloft og þægileg samskipti fólks á milli.“
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
