Það hefur verið nóg um að vera í starfsstöðvum okkar í desember við undirbúning og umsýslu prófa. Í törninni núna voru um 400 próf tekin sem er svipað og í fyrra og svo má reikna með sjúkra- og úrbótaprófum snemma í janúar.

Stærsti hluti prófanna er tekin á Egilsstöðum og Reyðarfirði en á flestum starfsstöðvum hefur verið þó nokkuð um próftöku. Þannig hafa á fjórða tug prófa verið þreytt á Djúpavogi en frá því í vor hefur verið fastur starfsmaður í Djúpinu, starfsstöð okkar á Djúpavogi. Eitt af því sem ávannst við opnun starfsstöðvarinnar var að grunnskólinn á staðnum losnaði við umsýslu vegna prófa fjarnema. Sú umsýsla sem lenti áður á herðum starfsmanna skólans var orðin ærin en núna í desember hafa verið tekin 32 próf.

Katrín Reynisdóttir, verkefnastjóri Austurbrúar á Djúpavogi, telur að nemendur séu nokkuð sáttir við aðstöðuna. „Sumir vissu ekki af henni og geta jafnvel hugsað sér að nýta hana í næstu framtíð við heimanám,“ segir hún. „Því ber að fagna enda virðist vera töluverður fjöldi einstaklinga búsettra á Djúpavogi í fjarnámi. Það er virkilega jákvætt þegar góð námsaðstaða er til staðar fyrir heimamenn þar sem ekki hafa allir frið og ró til þess að sinna námi sínu heima við. Við vonum bara að framhald verði á og fleiri sjái sér hag í því að nýta Djúpið,“ sagði Katrín.