Síðan í byrjun október hafa hjónin Svein Erik Tøien og Marie Elisabeth Mjaaland verið á Vopnafirði í listamannadvöl sem er hluti af lista- og menningarsamstarfi Austurlands og Vesterålen í Norður-Noregi en samstarfið fagnar í ár fimmtán ára afmæli.

Svein Erik er menntaður arkitekt með sérstakan áhuga fyrir ljósmyndun. Hann segist upptekinn af „að fanga hið töfrandi og „ósýnilega“ í náttúrunni.“ Á Vopnafirði hefur hann m.a unnið að verkefni sem hann kallar „Hjartslátt náttúrunnar“.  Með myndavélina að vopni hefur hann reynt að „komast undir yfirborðið“ á náttúrunni og í því sambandi einbeitt sér m.a. að hreyfingu vatns. Myndir hans frá Vopnafirði og nágrenni verða sýndar í Kaupvangskaffi fimmtudaginn 26.10 kl. 20:00. Sýningin verður formlega opnuð með kynningu á verkefninu og umræðum. Allar myndirnar verða til sölu og mun upphæðin renna óskert til annarra listrænna verkefna á Vopnafirði.

Svein Erik hefur einnig unnið verkefni í samstarfi við nemendur úr 2. – 4. bekk Vopnafjarðarskóla. Í verkefninu lærðu börnin að búa til pappírsbáta og fylgdust með afdrifum þeirra í læk sem rennur í Hofsá. Teknar voru fjölmargar ljósmyndir sem sýndar verða í skólanum á morgun. Svein Erik bjó til ævintýri sem tengist bátasmíðinni sem skólinn fær afhent á þremur tungumálum.