Mannauður í austfirskum sveitum virkjaður
Á miðvikudaginn í næstu viku, þann 23. ágúst, verður efnt til íbúaþings um framtíðartækifæri í sveitum á Austurlandi. Fundurinn er opinn öllum sem búa í austfirskum sveitum eða láta sig málefni þeirra varða. Páll Baldursson, verkefnastjóri hjá Austurbrú, stýrir verkefninu en það er unnið í samvinnu við Félag ungra bænda og Búnaðarsamband Austurlands.
Áhersla á atvinnuuppbyggingu
Páll er í viðtali við Austurgluggann í vikunni og þar segir hann m.a.:
„Við erum að koma á samtali til að fá fram hvaða hugmyndir séu á lofti. Fókusinn verður á atvinnuuppbyggingu þótt skilaboð um uppbyggingu innviða geti falist innan um eins og reyndin hefur verið í svona verkefnum.“
Eins og komið hefur fram fékk verkefnið styrk úr stefnumótandi byggðaáætlun fyrr á árinu en íbúaþingið í næstu viku er upphaf að vinnu þess en gert er ráð fyrir að þetta átak sem nú er hrint af stað verði í eitt ár. Niðurstöður íbúaþingsins munu að vonum varpa skýru ljósi á verkefni næstu mánaða.
„Við segjum ekki fyrirfram hvað eigi að gera en við ætlum okkur að virkja þann mannauð sem býr í sveitunum. Hluti þessa fjármagns getur farið í að kaupa námskeið eða aðra sérfræðiaðstoð sem nýtist í verkefnið,“ segir Páll í viðtalinu og þar kemur líka fram að þótt verkefnið sé unnið með samtökum bænda snúist það alls ekki eingöngu um landbúnað. „Þarna geta verið alls konar verkefni innan um. Við munum sjá hvernig verkefnið þróast og vonandi getur það staðið lengur en þetta eina ár og vonandi verða til einhverjir klasar sem lifa áfram,“ segir Páll en viðtalið má lesa í heilt sinni í nýjasta tölublaði Austurgluggans.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
