Austurbrú hóf nýverið þátttöku í verkefni sem snýr að því að mynda tengslanet fullorðinsfræðsluaðila og lítilla stofnana sem vinna að ferðamálum á strjálbýlum svæðum á Norðurlöndum og Eystrasaltslöndunum.

Frumkvæðið að verkefninu kom frá Litháen en í því taka þátt stofnanir í Svíþjóð og Eistlandi auk Liltháen og Austurbrúar. Verkefnið heitir „Tourism Development Challenges in Nordic and Baltic Countries“ og er tilgangur þess að byggja upp tengslanet fullorðinsfræðsluaðila sem vinna að ferðamálum á strjálbýlum svæðum á Norðurlöndunum og Eystrasaltslöndunum.

Verkefnastjórarnir Hulda Guðnadóttir og Sigrún Víglundsdóttir taka þátt í verkefninu fyrir hönd Austurbrúar og segir sú síðarnefnda að þessi lönd glími öll við samskonar mál þegar kemur að fræðslu fyrir ferðaþjónustuaðila. „Maður veit aldrei fyrir fram hvað kemur nákvæmlega út úr svona verkefnum en tengsl við önnur svæði sem eru að kljást við svipuð vandamál og við geta gefið nýjar lausnir og mögulega verða til fleiri verkefni.  Semsagt menn læra hver af öðrum.  Ein af afurðum verkefnisins er að safna saman „best practice“ dæmum um ferðaþjónustu á þátttökusvæðunum“ segir Sigrún.

Á dögunum sóttu þær fund í Klaipéda í Litháen sem var eins konar „kick off“ fundur fyrir verkefnið. „Á fundinum kynntu þátttakendur sig, sín svæði og sínar stofnanir,“ segir hún. „Verkefnum var skipt niður á þátttakendur og tímamörk sett.  Þetta gekk allt vel og hópurinn náði vel saman.“

Næstu skref eru þau að allir þátttakendur skipuleggja heimsókn á sitt svæði.  Næst verður farið til Svíþjóðar í apríl 2015 en hópurinn hittist svo á Íslandi næsta haust og síðast í Eistlandi veturinn 2015 – 2016.   Áætlað er að vefsíða verkefnisins fari í loftið í kringum áramót og Austurbrú sér um að gefa út fjögur fréttabréf, það fyrsta í febrúar 2015.