Umsóknarfrestur í Uppbyggingarsjóð Austurlands fyrir árið 2020 rann út föstudaginn 3. janúar síðastliðinn. Mikil gróska virðist vera í menningu og atvinnuþróun á Austurlandi því aldrei hafa eins margar umsóknir borist til sjóðsins. Að þessu sinni var samtals sótt um styrki fyrir 126 verkefni, þar af var 71 umsókn til verkefna á sviði menningarmála og 55 umsóknir til verkefna í nýsköpun og atvinnuþróun.
Heildarkostnaður við verkefnin er 560 milljónir króna og sótt er um styrki fyrir samtals 193 milljónum króna. Samkvæmt áætlunum í umsóknum er gert ráð fyrri að verkefnin skapi alls 54 ársverk.
Ný Sóknaráætlun Austurlands var unnin á síðasta ári og tók gildi nú um áramótin. Uppbyggingarsjóður Austurlands er hluti af Sóknaráætluninni og áherslur sjóðsins taka mið af henni. Ný handbók var unnin fyrir umsóknarferlið en þar koma fram áherslur Sóknaráætlunar sem virðast hafa vakið áhuga og verið í samræmi við þarfir samfélagsins á Austurlandi.
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn