Kraftmikil austfirsk ferðaþjónusta
Þrjátíu og fimm austfirsk ferðaþjónustufyrirtæki mæta á ferðakaupstefnuna Mannamót sem fram fer í Kórnum, Kópavogi, í janúar. Aldrei hafa fleiri fyrirtæki á Austurlandi skráð sig til þátttöku.
Metskráning á Mannamót
Aldrei hafa jafn margir austfirskir ferðaþjónustuaðilar skráð sig á ferðakaupstefnuna Mannamót sem fram fer í Kópavogi í janúar. Verkefnastjóri markaðsmála hjá Austurbrú segir þetta til marks um þá miklu grósku sem finna megi í austfirskri ferðaþjónustu þessi misserin.
Aukningin á milli ára er töluverð. Í fyrra skráðu sig 21 fyrirtæki, sem þótti raunar fínasta þátttaka, en í ár voru 31 fyrirtæki búin að skrá sig þegar umsóknarfresturinn rann út fyrr í vikunni. Þar af eru nokkrar skráningar sem ná yfir fleiri en eitt fyrirtæki. „Við erum því að horfa á það að frá Austurlandi séu að mæta um 35 fyrirtæki á Mannamót – sem er frábært,“ segir Sigfinnur Björnsson, verkefnastjóri í markaðsmálum hjá Austurbrú.
Hann segir þetta til marks um mikla grósku í austfirskri ferðaþjónustu. „Við erum að sjá mikla aukningu í afþreyingu á svæðinu á undanförnum tveimur árum og það útskýrir að einhverju leyti þennan aukna áhuga á Mannamótum. Það er virkilega dýrmætt fyrir áfangastaðinn að geta sýnt fram á hversu fjölbreytta þjónustu verið er að veita í landshlutanum,“ segir hann.
Hvaða máli skipta Mannamót fyrir ferðaþjónustufyrirtækin á Austurlandi?
„Mannamót eru stærsti ferðaþjónustuviðburður sem haldinn er á Íslandi og sömuleiðis er hann töluvert ódýrari en aðrir viðburðir. Viðburðurinn er fyrst og fremst hugsaður fyrir fyrirtæki utan höfuðborgarsvæðisins til að sýna sig og kynna vörur sínar fyrir innlendum jafnt sem og erlendum ferðaskrifstofum og fyrirtækjum. Hér fá fyrirtækin tækifæri til að stækka tengslanetið, mynda ný sambönd og viðhalda eldri viðskiptatengslum. Það er ótrúlega mikilvægt að geta hist í raunheimum og tekið samtal við aðila sem þú hefur e.t.v. eingöngu verið í tölvupóstsamskiptum við í einhver ár en aldrei hitt. Og það er ekki síst gríðarlega mikilvægt að halda slíkan viðburð þar sem allir hafa jöfn tækifæri óháð fjárhag eða stærð.“
Hverju eiga þeir sem eru að fara í fyrsta skipti von á?
„Við lofum miklu stuði,“ segir Sigfinnur. „Í fyrra komu um 800 gestir á Mannamót og þó það sé mikilvægt að manna sinn bás og taka á móti gestum mæli ég alltaf með því að fólk taki sér nokkrar mínútur í að kíkja á aðra landshluta, skoða hvað fyrirtækin eru að gera, stækka tengslanetið og fá jafnvel hugmyndir að einhverju sniðugu sem hægt væri að gera hér fyrir austan. Það mikilvægasta er svo að gleyma ekki að hafa gaman!“
Er þetta tilhlökkunarefni fyrir verkefnastjóra í markaðsmálum hjá Austurbrú?
„Já, maður er alltaf jafn spenntur fyrir Mannamótum og það er heiður að fá að vera fulltrúi Austurlands þarna. Ég er alveg sérstaklega spenntur að þessu sinni vegna þessarar góðu þátttöku hjá austfirsku fyrirtækjunum. Svo eru Mannamót einfaldlega einn af hápunktum íslenskrar ferðaþjónustu á hverju ári og sem markaðsmaður í þessari starfsgrein vil ég auðvitað hvergi annars staðar vera!“
Mannamót markaðsstofa landshlutanna
Mannamót 2024 verða haldin fimmtudaginn 18. janúar í Kórnum, Kópavogi. Þetta er árleg ferðakaupstefna sem haldin er af Markaðsstofum landshlutanna og helsti kynningarvettvangur ferðaþjónustunnar á landsbyggðinni.
Um Mannamót
Nánari upplýsingar
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
