Austurbrú stýrir gerð nýrrar Sóknaráætlunar Austurlands til næstu fimm ára í samstarfi við ráðgjafafyrirtækið Capacent. Í henni kemur fram framtíðarsýn Austurlands og þau markmið og aðgerðir sem íbúar Austurlands vilja sjá í framtíðinni.

Framlag almennings á Austurlandi er lykilatriði svo að þessi vinna takist vel og mikilvægt að við sem landshluti sköpum áætlun sem er raunhæf, framsækin og til þess fallin að efla landshlutann enn frekar. ​

Þeir málaflokkar sem eru til umfjöllunar eru atvinna, nýsköpun, menning og umhverfismál. Þetta eru allt undirstöðuþættir hvað snertir lífsgæði á svæðinu og eru forsenda þess að fjórðungurinn geti talist aðlaðandi búsetukostur.​

Sóknaráætlanir eru stefnumótandi áætlanir og taka til starfssvæða landshlutasamtaka sveitarfélaga. Sóknaráætlun Austurlands nær því til starfssvæðis SSA sem nær frá Vopnafirði í norðri að Djúpavogi í suðri, svæði sem á búa tæplega 10.700 manns. 

Yfirgripsmesta þekkingin á landshlutanum býr hjá almenningi og því er afar mikilvægt að sem flestir taki þátt í vinnunni. Við hvetjum íbúa Austurlands til að mæta á vinnufundi næstu daga og koma hugmyndum sínum á framfæri. Rétt er að taka fram að Sóknaráætlunin er lögð til grundvallar við úthlutun úr Uppbyggingarsjóði Austurlands og öll verkefni sem fá styrk úr sjóðnum verða að falla að áherslum hennar.  

Fundirnir verða haldnir á eftirfarandi stöðum:

MÁNUDAGUR 9. SEPTEMBER​

• Vopnafjörður 11:30-13:30​
• Egilsstaðir 17-19​

​​ÞRIÐJUDAGUR 10. SEPTEMBER​

• Djúpivogur 11-13​
• Reyðarfjörður 18-20​

Fundunum er stýrt af ráðgjöfum frá Capacent sem bjóða upp á skemmtilega nálgun á viðfangsefninu m.a. með peningaspilinu Goal – O – Poly.

Nánari upplýsingar fást hjá Signýju Ormarsdóttur hjá Austurbrú // 470 3800