Austurbrú 5 ára: Hver erum við?

Við höldum áfram að kynnast starfsfólki Austurbrúar. Næstur er sá okkar með langa nafnið: Jón Steinar Garðarsson Mýrdal. Hann hefur einna stystan starfsaldur hjá okkur en það skiptir engu máli. Við hjá Austurbrú erum vön fólki með stuttan starfsaldur og Jón hefur fallið eins og flís við rass í starfsmannahópinn sem kallar ekki allt ömmu sína þegar kemur að kynlegum kvistum. Þá er hann aðdáandi Beach Boys og hvað þarf meira? Fátt. Allt umfram það er bónus. 

Fjölskylduhagir?

„Ég er giftur Þórveigu Jóhannsdóttur og við eigum Óskar Mána sem er 3 ára fílaáhugamaður.“

Aldur og fyrri störf?

„Ég er 33 ára. Áður en ég hóf störf hjá Austurbrú síðasta haust hafði ég eitt um 12 árum innan veggja háskóla, fyrst Háskóla Íslands en svo Danska Tækniháskólans. Þar vann ég að rannsóknum meðfram og að loknu námi. Rauði þráðurinn í mínum rannsóknum hafa verið tæknilausnir sem hægt er að nýta í vistvænum samgöngum, eins og nýjar tegundir af rafhlöðum, geymsla á vetni eða framleiðsla á eldsneytum með rafefnafræðilegum hætti. Í Danmörku kenndi ég líka dans sem heitir Lindy Hop og eftir að við fluttum á Egilsstaði höfum við kennt nokkra tíma í Dansskóla Austurlands. Áður en ég byrjaði í háskóla hafði ég unnið á leikskólanum Sólhlíð, í kjötborðinu í Nóatúni, á leikjanámskeiðum og ýmsum fleiri stöðum.“

Helstu verkefni og hvaða máli skipta þau?

„Mitt megin verkefni heitir Orkuskipti á Austurlandi. Í því verkefni er unnin greining á því hvernig við á Austurlandi getum hætt að brenna jarðefnaeldsneytum á næstu áratugum og notað frekar orku úr heimahéraði á bílana okkar og vonandi skipin í framtíðinni. Verkefnið snýst líka um uppbyggingu á innviðum sem styrkja Austurland í þessari vegferð. Ég stjórna líka gerð innviðagreiningar fyrir Fljótsdalshérað og svo kem ég reglulega að öðrum atvinnuþróunarverkefnum innan Austurbrúar.“

Helgin er galopin, engar kvaðir (þarft ekki slá blettinn, mála húsið – ekki neitt) og hvað gerir þú þá?

„Ég myndi líklega reyna að nýta hana með fjölskyldunni eins og hægt væri, njóta nátúrunnar hérna í kringum okkur, fara í sund og svo myndi ég líklega elda einhvern góðan mat. Um kvöldið myndi ég kannski spila með góðum vinum eða fara á tónleika. Best væri samt auðvitað ef maður kæmist eitthvað til þess að dansa almennilega!“

 Mesta hrós sem þú hefur fengið er…?

„Eftir mjög svefnlitlar vikur í aðdraganda þess að ég skilaði doktorsritgerðinni minni þá skipti það mig miklu máli að fá mjög jákvæða umsögn frá andmælendunum mínum þegar ég hafði lokið við það að verja hana.“

Lýstu internetinu í einni setningu.

„Það er samtímis mesta uppspretta snilldar og vitleysu sem fyrirfinnst.“

Myndir þú borða lifandi randaflugu gegn greiðslu? Hvers vegna/hvers vegna ekki?

„Nei, mér finnst það frekar andstyggilegt að borða einhvern á meðan hann er lifandi, jafnvel þótt viðkomandi sé skordýr.“

Botnaðu: Austurland er…

„Allskonar.“

Hver eru bestu kaup sem þú hefur gert?

„Bróðir minn var hálft ár í ungmennaskiptum í Mósambík. Ég held að ein bestu kaupin sem ég hafi gert séu flugmiðar þangað til þess að ferðast með honum bæði þar og í Suður-Afríku. Það var mjög ánægjuleg og lærdómsrík ferð sem jafnframt reyndi á tímum vel á þægindarammann.“

Eru einhverjar óskrifaðar reglur á vinnustaðnum þínum?

„Ég hef allavega ekki rekið mig á þær ennþá.“

Lýstu heimi þar sem allir eru eins og þú í hegðun og hugsun? Þrjár setningar, takk. 

„Það er auðvitað freistandi að segja að hann væri fullur af hamingju og dansi en líklega væri hann frekar einsleitur og leiðigjarn.“

Ananas á pítsur, gengur það upp?

„Það gengur en er ekki æskilegt…“

Á hvaða stundum leiðist þér?

„Þegar fólk talar frekar í vandamálum en lausnum.“

Segðu okkur frá uppáhalds laginu þínu.

„Ég hlusta mjög mikið á tónlist og ég hlusta á mjög fjölbreytta tónlist, en ég er alls ekki alæta á tónlist. Ég og nokkrir vinir mínir höfum sett saman lagalista í sameiningu sem heitir “Besta lag ALLRA TÍMA!”… eins og er inniheldur hann 94 lög. Ég hef hlustað meira og meira á jazz í seinni tíð og lög eins og Strange Meadow Lark með Dave Brubeck Quarted eða Turiya & Ramakrishna með Alice Coltrain finnast mér ótrúlega góð. Mér þykir samt rosalega vænt um allskonar önnur lög eins og Marble House með the Knife, Love Letters með Ketty Lester, Don’t talk (Put your head on my shoulder) með the Beach Boys og margt, margt, margt fleira…“

Vetur eða sumar? Rökstyddu.

„Þegar ég var unglingur var ég heltekin af því að komast á snjóbretti og hefði alltaf valið veturinn. Eftir að hafa búið 7 ár í Danmörku er snjóbrettafíknin lögst í dvala í bili og veturinn á erfitt með að keppa við björtu íslensku sumarnæturnar…“