Jóney Jónsdóttir hefur verið ráðin til Austurbrúar. Hún mun einkum sinna verkefnum á sviði menntamála og verður með starfsaðstöðu á Egilsstöðum.

Helstu verkefni hennar munu tengjast umsjón og skipulagningu námskeiða og annarrar fræðslu, umsýslu prófa á Egilsstöðum, gerð fræðsluáætlana fyrir stofnanir og fyrirtæki auk annarra verkefna.

Jóney er menntuð í íslensku og uppeldis- og kennslufræði frá Háskóla Íslands en að loknu námi hóf hún störf sem íslenskukennari við Menntaskólann á Egilsstöðum og vann þar í tæpa tvo áratugi. Auk kennslu sinnti hún til skamms tíma kennslustjórn fjarnáms og sat í ýmsum nefndum á vegum skólans. Síðustu ár hefur Jóney starfað við Framhaldsskólann á Húsavík þar sem hún sinnti áfangastjórn og var um tíma aðstoðarskólameistari. Síðastliðið skólaár var hún skólameistari Framhaldsskólans.

Jóney er gift Gunnlaugi Aðalbjarnarsyni viðskiptafræðingi og saman eiga þau fjórar stúlkur á aldrinum ellefu til tuttugu og tveggja ára. Hún er uppalin í Saurbæ á Hvalfjarðarströnd en hefur búið á Egilsstöðum frá árinu 1996 með tveimur stuttum hléum sem fjölskyldan notaði til búsetu í Kaupmannahöfn, Reykjavík og Húsavík. Aðspurð um áhugamál segir Jóney að fjölskyldan með sín fjögur börn sé visst áhugamál. „Einhvern veginn hefur okkur tekist að sameina áhugamálin,“ segir hún. „Fjölskyldan hefur gaman af gönguferðum, útilegum, ferðalögum innanlands og utan, fjölbreyttri hreyfingu og hvers kyns íþróttaviðburðum.“

Og Jóneyju líst vel á nýja starfið hjá Austurbrú: „Það verður gaman að taka nýjan vinkil á kennslu og menntamál og bæta enn í reynslubankann þar,“ segir hún og bætir við: „Öflugur starfshópur Austurbrúar gefur vísbendingar um gott starf og ég hlakka til að vera hluti af því.“