Líneik Anna Sævardóttir hefur verið ráðin til Austurbrúar og hóf hún störf um síðustu mánaðarmót. Hún mun hafa starfsaðstöðu á Reyðarfirði og hennar helstu verkefni verða á sviði símenntunar

Líneik er líffræðingur að mennt og með kennsluréttindi. Hennar störf hjá Austurbrú lúta einkum að menntamálum en meðal verkefna má nefna gerð fræðsluáætlana með fyrirtækjum og stofnunum og skipulagning ýmis konar námskeiða fyrir atvinnulífið og einstaklinga á Austurlandi.

Líneik hefur mikla reynslu á sviði menntamála, mest af starfi við símenntun og grunnskóla. Hún var um tíma kennari og síðar skólastjóri við Grunnskóla Fáskrúðsfjarðar. Hún kom líka að stofnun Fræðslunets Austurlands (síðar Þekkingarnet Austurlands) en hún sat í háskólanefnd SSA sem kom að stofnun Fræðslunetsins. Síðar varð hún framkvæmdastjóri þess en eins og flestum er kunnugt er það einn af forverum Austurbrúar.  „Fyrsta fasta starfið að loknu háskólanámi var starf Endurmenntunarstjóra við Bændaskólann á Hvanneyri,“ segir Líneik. „Það má segja að þá hafi ég kolfallið fyrir símenntuninni og áttað mig á því hve miklu máli aðgengi að símenntun skiptir fyrir þróun atvinnulífs og samfélagsins alls.“ 

Hún hefur mikinn áhuga á samfélagsmálum og hefur verið viðloðandi stjórnmál í um tuttugu ár. Hún var bæjarfulltrúi í Búðahreppi og Austurbyggð í átta ár, sat á Alþingi frá árinu 2013 til 2016 og er í dag varaþingmaður Framsóknarflokksins í NA-kjördæmi.

Líneik er fædd og uppalin í Rauðholti í Hjaltastaðaþinghá á Fljótsdalshéraði.  Hún er gift Magnúsi Birni Ásgrímssyni, saman eiga þau fjögur börn á aldrinum 17 til 28 ára og hafa síðustu tuttugu ár búið á Fáskrúðsfirði.

Líneik segist full tilhlökkunar að takast við ný verkefni hjá Austurbrú. Eins og fyrr segir mun hún hafa starfsaðstöðu á Reyðarfirði en sinna verkefnum um allt Austurland. „Mér líst mjög vel á mig í nýju starfi,“ segir hún. „Það er virkilega gaman að koma inn í þann öfluga hóp fólks sem starfar hjá Austurbrú og fá að tvinna saman áhugamál og starf, með vinnu að þróun samfélagsins á Austurlandi í gegnum símenntunina.“