Þá hefur hún skoðað stöðu innflytjenda á svæðinu og unnið að greiningarverkefnum fyrir fyrirtæki og stofnanir á Austurlandi. Á undanförnum árum hefur Tinna einnig sinnt verkefnisstjórn með Uppbyggingarsjóði Austurlands, stýrt vinnu við sóknaráætlun Austurlands, gegnt stöðu trúnaðarmanns starfsmanna og tekið þátt í alls konar verkefnum þvert á öll svið stofnunarinnar. Í starfi yfirverkefnastjóra mun hún taka sæti í stjórnendateymi Austurbrúar, sinna mannauðsverkefnum og ýmsum verkefnum sem tengjast innra starfi stofnunarinnar.

Mörg verkefni framundan

Tinna segist hlakka til að takast á við ný verkefni í nýju starfi hjá Austurbrú. „Það er margt sem liggur fyrir,“ segir hún og heldur áfram: „Komið er að alls konar uppfærslum og skerpingu á innri ferlum. Við vorum t.d. að fá samþykki frá Starfsþróunarsetri BHM um innleiðingu fræðsluáætlunar fyrir starfsmenn en í þekkingarstofnun eins og Austurbrú þar sem sérfræðingar með ólíkan bakgrunn koma saman þarf að huga vel að því að starfsmenn hafi tækifæri til að efla sig í starfi og fylgjast með því nýjasta á sínu sviði.“

„Hjá Austurbrú er frábær hópur starfsmanna sem fæst við fjölbreytt verkefni á ólíkum sviðum. Starfsandinn er góður og liðsheildin sterk. Starfsumhverfið er dínamískt og samvinnan er þverfagleg sem gerir vinnustaðinn skemmtilegan og áhugaverðan og vinnuna fjölbreytta.“

Tinna er Þórshöfn á Langanesi en hefur búið á Egilsstöðum í fimmtán ár. Eins og svo margir flutti hún austur og ætlaði sér að dvelja í ár en fékk áhugaverð tækifæri í vinnu svo það hefur teygst vel úr þessu eina ári sem lagt var upp með. Hún er menntaður félagsfræðingur, framhaldsskólakennari og förðunarfræðingur. Þá er hún jógakennari og er einn af eigandum Simply Yoga sem nú er að hefja sitt tíunda starfsár. Hennar helsta áhugamál er myndlist og hún notar flestar lausar stundir til að iðka hana. Hún spilar frisbígólf með eiginmanni sínum og er raunar nýbúin að stofna Frisbífélag Austurlands með góðu fólki til að efla íþróttina og aðstöðuna hér á svæðinu. Þá er hún mikill lestrarhestur og liggur yfir glæpasögum við hvert tækifæri sem gefst.