Fjölmargir kostir
„Í landshlutanum er unnið með gríðarlegt magn af sjávarafurðum. Þá á ég við uppsjávarfisk, bolfisk og lax. Þetta hráefni skapar fjölmörg tækifæri fyrir áhugasamt fólk að vinna eitthvað nýtt og spennandi með“ – Arnfríður Eide Hafþórsdóttir, verkefnastjóri hjá Austurbrú.
Nýsköpunarkeppni fyrir grunnskólabörn
Austurbrú, í samstarfi við Verkmenntaskóla Austurlands, Matís og Grunnskóla Reyðarfjarðar, Eskifjarðar og Neskaupstaðar standa í haust fyrir nýsköpunarkeppni í sjávarútvegi. Tilgangurinn er að vekja áhuga ungs fólks á tækifærum í sjávarútvegi. Úrslit keppninnar verða kynnt á Tæknidegi fjölskyldunnar sem fer fram að venju í húsakynnum VA í haust.
Nýtt verkefni
Nýsköpunarkeppnin er nýtt verkefni sem kviknaði hjá áhugafólki um nýsköpun í sjávarútvegi á Íslandi en þess má geta að Matís hefur farið af stað með svipaða keppni á landsvísu í samvinnu við framhaldsskóla landsins.
Mörg tækifæri í sjávarútvegi
Arnfríður Eide Hafþórsdóttir, verkefnastjóri hjá Austurbrú, segir við hæfi að svona keppni fari fram á Austurlandi.
„Í landshlutanum er unnið með gríðarlegt magn af sjávarafurðum. Þá á ég við uppsjávarfisk, bolfisk og lax. Þetta hráefni skapar fjölmörg tækifæri fyrir áhugasamt fólk að vinna eitthvað nýtt og spennandi með,“ segir hún.
Það verða nemendur í níunda og tíunda bekk sem taka þátt í keppninni en báðir árgangar hafa lokið við Sjávarútvegsskóla unga fólksins sem er samvinnuverkefni vinnuskóla sveitarfélaganna, Sjávarútvegsmiðstöðvar Háskólans á Akureyri og fyrirtækja í sjávarútvegi og tengdum greinum.
Undirbúningur að keppninni er þegar hafin en nemendur skólanna hafa fengið kynningu á keppninni og þeim aðferðum sem þau geta beitt við vinnslu hugmynda og munu næstu sex vikurnar geta unnið að sínum verkefnum sem hluta af sínu námi. Allir nemendur fá sama hráefni til að vinna með en um er að ræða kvarnir úr kolmunna, hráefni sem er ekkert nýtt í dag. Á undirbúningstímanum munu nemendur auk þess fá aðstoð og fræðslu frá „mentorum“ úr atvinnulífinu. Fjallað verður um aðferðir í nýsköpun og uppsetningu á sölukynningu hugmyndar eða lokaafurðar svo eitthvað sé nefnt.
Úrslit á Tæknideginum
Í dómnefndinni sitja m.a. fulltrúar úr atvinnulífinu og frá Samtökum fyrirtækja í sjávarútvegi og verða úrslitin, sem fyrr segir, kveðin upp á Tæknidegi fjölskyldunnar sem fer fram í húsakynnum Verkmenntaskólans laugardaginn 2. október.
Nánari upplýsingar
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
