Þann 19. júní sl. fékk Austurbrú formlega afhentan styrk frá Alcoa Foundation að upphæð 120.000 bandaríkjadala. Styrkurinn er veittur fyrir verkefnið Orkuskipti á Austurlandi sem hefur verið starfrækt hjá Austurbrú frá árinu 2016. Unnið hefur verið að uppsetningu á hleðslustöðvum fyrir rafmagnsbíla í samstarfi við sveitarfélögin á Austurlandi. Nemendaverkefni hafa verið unnin hjá Austurbrú eða í samstarfi við Austurbrú sem tengjast orkuskiptum, auk þess sem verið er að vinna sviðsmyndagreiningu fyrir jarðefnaeldsneytislaust Austurland þar sem dregnar eru fram þær áskoranir og tækifæri sem felast í því að hætta brennslu á olíu í landshlutanum. Stefnt er á að afurðir verkefnisins nýtist í vinnu við gerð loftslagsáætlunar fyrir Austurland og frekari uppbyggingarverkefna á sviði orkuskipta.

Mynd: Frá afhendingunni, f.v. Dagmar Ýr Stefánsdóttir, upplýsingafulltrúi Alcoa, Rosa García, framkvæmdastjóri Alcoa Foundation, Jón Steinar Garðarsson og Anna Alexandersdóttir frá Austurbrú.