Páll Guðmundur Ásgeirsson hefur verið ráðinn til Austurbrúar og mun sinna fyrst og fremst verkefnum á sviði markaðsmála. Hann hefur þegar hafið störf og verður með starfsaðstöðu á Reyðarfirði.

Páll er 41 árs gamall Vestfirðingur en hefur búið í Fjarðabyggð með fjölskyldu sinni frá árinu 2009. Hann hefur unnið við ýmislegt í gegnum tíðina m.a. fengist við fiskvinnslu og sjómennsku og rak á tímabili sína eigin útgerð. Hann er með menntun í ferðamálafræði við Háskólann á Hólum en að námi loknu tók hann við rekstri Laugarfellsskála í Fljótsdalshreppi og rekur hann enn.

Páll mun, sem fyrr segir, sinna verkefnum á sviði markaðsmála en meðal helstu verkefna eru eftirfarandi:

–          Rekstur og umsjón með ferðaþjónustuvefnum East.is og tilheyrandi samfélagsmiðlum.

–          Skipulagning blaðamannaferða og almenn upplýsingagjöf til fjölmiðla. 

–          Samskipti og upplýsingamiðlun til samstarfsaðila.

–          Önnur tilfallandi verkefni á sviði markaðsmála.

Við bjóðum Pál velkominn til starfa!