Austurbrú 10 ára: Hreyfiafl á Austurlandi
Rík hefð fyrir samstarfi
Þegar Austurbrú var stofnuð settu menn sér metnaðarfull og háleit markmið. Eitt þeirra var að einfalda stjórnsýslu t.d. með því að einfalda samskipti ríkis og sveitarfélaga sem þá voru átta talsins á Austurlandi en eru fjögur í dag. Hólmfríður Sveinsdóttir, sérfræðingur á sviði byggðamála í innviðaráðuneytinu og formaður stýrihóps Stjórnarráðs um byggðamál var á stofnfundi Austurbrúar þann 8. maí 2012, þá sem starfsmaður Byggðastofnunar.
Lýsir framsýni Austfirðinga
„Ég hef fengið tækifæri til að fylgjast með starfinu frá byrjun og verið í góðum samskiptum við starfsfólk Austurbrúar þessi tíu ár,“ segir Hólmfríður og óskar Austfirðingum til hamingju með áfangann. „Stofnun Austurbrúar lýsir að mínu mati framsýni Austfirðinga. Þótt það hafi verið einhverjir byrjunarerfiðleikar tel ég að það hafi bara styrkt Austurbrú að takast á við þær áskoranir.“
Sögulega hefur Austurland staðið framarlega þegar kemur að samvinnu innan landshlutans en Samband sveitarfélaga á Austurlandi eru t.d. meðal fyrstu landshlutasamtaka á landinu, stofnuð 1966. Hólmfríður segir að þessi hefð fyrir samstarfi sé eflaust ein helsta ástæða þess að íbúar á Austurlandi hafi fyrstir ákveðið að sameina stoðstofnanir sínar undir einn hatt.
„Það eykur slagkraft landshlutans að vinna saman og það er hlýtur að einfalda Austfirðingum lífið að hafa alla þessa þjónustu undir einum hatti,“ segir hún. „Það einfaldar líka oft samskipti ríkisins við landshlutana þegar hægt er að leita á einn stað,“ segir Hólmfríður en bætir við: „Á sama tíma má ekki gleyma að sveitarfélögin eru sjálfstæðar stjórnsýslueiningar sem bæði ríkið og Austurbrú verða að vera meðvituð um.“
Fylgist vel með
Sem fyrr segir hefur Hólmfríður fylgst vel með störfum Austurbrúar. „Hún hýsir mörg verkefni og nokkur þeirra hafa beina snertingu við verkefni sem ég sinni. Þar má helst nefna Sóknaráætlun Austurlands. Þá var gott að sjá hversu fljótt og faglega Austurbrú kom að málum með stjórnvöldum á Seyðisfirði eftir hamfarirnar 2020. Þar voru sannarlega sýnd snögg viðbrögð.“
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
