Árviss rithöfundalest fer um Austurland helgina 27. til 29. nóvember. Á ferð verða kunnir höfundar með nýjustu verk sín.

Iðunn Steinsdóttir varpar ljósi á langafa sinni í Hrólfs sögusem Salka gefur út, Jón Gnarr segir frá Útlaganum sem JPV gefur út og Kristín Helga Gunnarsdóttir les um Litlar byltingar sem kemur hjá JPV. Sigurjón Bergþór Daðason kemur með sína fyrstu bók, Hendingskasti, og Austfirðingurinn Smári Geirsson les úr riti sínu sem Sögufélagið gefur út, Stórhvalaveiðar við Ísland til 1915.

Auk ofangreindra rithöfunda verða með í för austfirskir höfundar og þýðendur: Ásgeir hvítaskáld, Davíð Þór Jónsson, Sigga Lára Sigurjónsdóttir, Sigurlaug Gunnarsdóttir, Unnur Sveinsdóttir og Högni Páll Harðarson.

Rithöfundalestin nýtur stuðnings Uppbyggingarsjóðs Austurlands, Alcoa Fjarðaáls, Flugfélags Íslands, Síldarvinnslunnar, Gullbergs og Bílaleigu Akureyrar auk forlaganna. Að henni standa Menningarmálanefnd Vopnafjarðar, Gunnarsstofnun, Skaftfell menningarmiðstöð og Umf. Egill Rauði. Viðkomustaðir eru fjórir að þessu sinni. Lesið verður í Kaupvangskaffi á Vopnafirði föstudagskvöld 27. nóv. kl. 20:30. Laugardag 28. nóv. kl. 14:00 verða höfundarnir á Skriðuklaustri í Fljótsdal og um kvöldið lesa þeir í Skaftfelli á Seyðisfirði kl. 20:30. Á sunnudegi 29. nóv. verða þeir síðan í Safnahúsinu í Neskaupstað kl. 14:00. 

Nánari upplýsingar veitir: Skúli Björn Gunnarsson, forstöðumaður Gunnarsstofnunar, í síma 860-2985 eða [email protected]