Í gærkvöldi var verkefnið ,,Àfangastaðurinn Austurland“ kynnt fyrir rýnihópi sínum á Karlsstöðum í Berufirði. Um þrjátíu manns hittust og skeggræddu stöðu þessa spennandi verkefnis.

Eins og sagt hefur verið frá var verkefnið Áfangastaðurinn Austurland sett af stað að frumkvæði Ferðamálasamtaka Austurlands árið 2012 en hefur frá byrjun verið stýrt af Austurbrú. Verkefnastjórarnir Lára Vilbergsdóttir og María Hjálmarsdóttir hafa leitt þessa vinnu auk ráðgjafans Daníels Byström sem er sérfræðingur í hönnun áfangastaða.

Á vinnustofunni í gær voru kynntar ýmsar tillögur sem lúta að sjónrænum þætti verkefnisins s.s. útlitsstaðlar, sameiginlegt lógó fyrir áfangastaðinn, leiðbeiningar í notkun myndefnis og ýmislegt fleira. Féllu tillögurnar í góðan jarðveg og á næstu misserum verða þær kynntar bæjarfulltrúum og almenningi á Austurlandi.

Við útbjuggum hlaðvarp fyrir þá sem vilja vita örlítið meira en í því ræðir María um verkefnið, sem hún kallar „hreyfingu“, og stöðu þess og þýðingu fyrir landshlutann.