Andi og stemmning Austurlands
Skreytir veggi flugstöðvarinnar
Listamaðurinn Rán Flygenring er þessa dagana að skreyta veggi flugstöðvarinnar á Egilsstöðum með glæsilegum myndum sem vekja vonandi kátínu hjá gestum Austurlands sem þar ganga um.
Skemmtileg upplifun
Þetta er svipað verkefni og unnið var við landganginn á Seyðisfirði í fyrrasumar. Jónína Brynjólfsdóttir, verkefnisstjóri hjá Austurbrú, segir að hugmyndin sé sú að skapa skemmtilega upplifun fyrir ferðamenn þegar þeir koma til Austurlands og raunar líka þegar þeir kveðja.
„Við vorum mjög ánægð með myndirnar á Seyðisfirði,“ segir hún. „Og það var alltaf ætlunin að halda áfram og myndskreyta fleiri staði í landshlutanum s.s. á flugvellinum og í þeim höfnum sem skemmtiferðaskip hafa viðkomu.“ Myndirnar eru líflegar og skemmtilegar, eins og sjá má, og nauðsynlegum upplýsingum komið áfram til ferðamanna með skýru og fjörugu myndmáli á sama tíma og þær fanga anda og stemmningu Austurlands.
Verkefnið er unnið með tilvísun í áherslur Áfangastaðarins Austurlands, verkefnis sem Austurbrú hefur stýrt síðustu ár og snýr m.a. annars að öflugu og vönduðu markaðsstarfi fyrir landshlutann. Verkefnið á Egilsstaðaflugvelli er samstarfsverkefni Austurbrúar og Isavia.
Nánari upplýsingar
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
