Austurbrú boðar til fundar með Discover The World klukkan 10:00 þann 30. nóvember á Hótel Héraði / Icelandair Hótelinu á Egilsstöðum. Fundurinn er hugsaður til að tengja saman fyrirtæki sem hafa áhuga á að vinna saman í tengslum við beina flugið.

Á mánudaginn næsta gefst fyrirtækjum tækifæri til að hitta forsvarsmenn Discover The World sem hefja beint flug á næsta ári frá London Gatwick til Egilsstaða.  Fyrsta flug er 28.maí og verður flogið tvisvar í viku til 24.september.

„Fundurinn er í raun haldinn til að tengja saman fyrirtæki sem hafa áhuga á að vinna saman í tengslum við beina flugið,“ segir María Hjálmarsdóttir, verkefnastjóri flugvallarverkefnisins hjá Austurbrú. Hún vonast til að fundurinn hafi hvetjandi áhrif á þjónustuaðila á svæðinu og hrindi jafnvel af stað þjónustu- og vöruþróunarvinnu. „Það er mikilvægt að ferðaþjónustuaðilar og önnur fyrirtæki á svæðinu mæti með opinn huga og séu á tánum því þetta er stórt tækifæri fyrir okkur sem við verðum að nýta.“

Allir þeir sem hafa áhuga á að bjóða upp á vörur- eða þjónustu í tengslum við millilandaflugið eru velkomnir á fundinn sem hefst kl 10:00. Þá hefjast almennar umræður um beina flugið, Clive Stacey, framkvæmdarstjóri, og Paavo Sonninen, verkefnastjóri fyrir Íslandsmarkaði, munu sitja fyrir svörum. Aðaláhersla fundarins verður á framboð afþreyingar á svæðinu en einnig verða önnur mál rædd.

Eftir hádegi gefst fundargestum tækifæri á að bóka sér tíma með Clive og Paavo. Þeir sem hafa áhuga á að að bóka fund vinsamlegast sendið póst á [email protected] og setjið í skýringu einn af neðangreindum möguleikum.

–              Er með tilbúna vöru

–              Er með vöru í vinnslu

–              Er með hugmynd að vöru

Eru þátttakendur vinsamlegast beðnir um að skrá sig á fundinn fyrir föstudaginn 27. nóvember.

Nánari upplýsingar veitir María Hjálmarsdóttir í síma 848 2218 // [email protected]