Láttu stjörnuna leiða þig
Undanfarin ár hefur verið unnið að því að auka sýnileika austfirskra matvæla með vörumerki Austurlands sem er Austurlandsstjarnan.
Stjarnan fyrir austfirskt hráefni
Halldóra Dröfn Hafþórsdóttir, verkefnastjóri Matarauðs Austurlands, segir tilganginn með verkefninu vera þann að hlúa að austfirskum matvælaframleiðendum, aðstoða þá við að koma vörum sínum á framfæri og þannig auka sölu og vitund almennings um þær fjölbreyttu matvörur sem framleiddar og unnar eru á Austurlandi.
Í fyrra var farið að stað með verkefnið „Láttu stjörnuna leiða þig“ en þá voru verslunarstjórar í austfirskum dagvöruverslunum hvattir til að merkja austfirskar matvörur sérstaklega í verslunum sínum og matvælaframleiðendur á svæðinu voru hvattir til að bjóða vörur sínar inn í verslanirnar. Nú er verkefnið unnið áfram; annars vegar með hvatningu til matvælaframleiðenda um að merkja umbúðir matvöru með stjörnunni og hins vegar með hvatningu til veitingaaðila um að stjörnumerkja þá rétti á matseðlum þar sem lykilhráefnið er austfirskt.
Frystiklefinn á Borgarfirði hefur riðið á vaðið og nú má sjá Austurlandsstjörnuna við ákveðna rétti á matseðlinum. Auður Vala, eigandi Blábjarga sem rekur Frystiklefann, segist strax hafa stokkið á tækifærið að setja Austurlandsstjörnuna á matseðilinn, enda sé stjarnan vörumerkið okkar og ákveðið upprunavottorð. Gestir hafa tekið eftir þessu og lýst ánægju með að vita hvaðan maturinn sem borinn er á borð er kominn. Einnig standi til hjá þeim að merkja vörur sem framleiddar eru í KHB brugghúsi með stjörnunni.
Auður Vala hvetur aðra veitingaaðila og matvælaframleiðendur til að stökkva á vagninn; setja sig í samband við starfsmenn Austurbrúar og fá leyfi til að merkja vörurnar sínar með stjörnunni. Hún minnir á að við séum mikið sterkari saman og því fleiri sem verði með, því meiri athygli muni austfirsk matvæla vekja og sýnileiki aukast.
Halldóra tekur undir þessi orð og hvetur áhugasama til að hafa samband við hana, Öldu Marín Kristinsdóttir og Sigfinn Björnsson sem aðstoðar fyrirtæki við að gerast samstarfsaðilar Austurlands en samstarfið er forsenda þess að geta tekið þátt í verkefninu.
Gleðilegt matarsumar!
Myndir: Austen Sheen
Frekari upplýsingar
Halldóra Dröfn Hafþórsdóttir
Sigfinnur Björnsson
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
