Það er stór dagur í starfsstöð Austurbrúar í Fróðleiksmolanum á Reyðarfirði þar sem Stóriðjuskólinnn byrjaður aftur eftir sumarfrí. Þetta er eitt af stærstu fræðsluverkefnum Austurbrúar og hefur mikla þýðingu fyrir starfsemina á Reyðarfirði enda fyllist húsið af fólki og fjöri. 

Kjartan Glúmur Kjartansson, verkefnastjóri hjá Austurbrú, stýrir verkefninu fyrir hönd Austurbrúar. Hann segir að almennt séu nemendur ánægðir ánægðir með námið en bæði er um að ræða grunn- og framhaldsnám. „Það eru ekki nýir hópar að byrja í haust heldur fimmtíu nemendur sem áður höfðu hafið nám hjá okkur,“ segir Glúmur en nemendur skiptast til helminga í grunn- og framhaldsnám. „Grunnhópurinn útskrifast vorið 2016 og framhaldshópurinn í desember 2016,“ bætir hann við.  

Eftirspurn eftir náminu er mikil en Alcoa sér um að velja og starfsmenn sem þurfa að hafa starfað í talsverðan tíma hjá fyrirtækinu til að geta sótt um. Námið er blanda af almennum bóklegum fögum og sérhæfðum sem tengjast framleiðslunni beint en hér má sjá námskrá frá Fræðslumiðstöð atvinnulífsins sem unnið er eftir í náminu. „Allir græða á því að bæta við þekkingu sýna en auðvitað er þetta spurning með launahækkun líka en námið tengist kjarasamningum starfsmanna,“ segir Glúmur og bætir við að námið sé jafnframt metið til eininga. 

Sem fyrr segir hefur þessi námsbraut mikla þýðingu fyrir Austurbrú enda talsvert fjármagn sem kemur í verkefnið bæði frá Fræðslumiðstöð atvinnulífsins og Alcoa en þetta breytir líka starfseminni á Reyðarfirði á þá leið að nokkrum sinnum í viku er húsnæðið fullt af lífi og fjöri.