„Það hefur skipt sköpum fyrir „Austurland Freeride Festival“ hátíðina að fá styrk úr Uppbyggingarsjóði Austurlands,“ segir Sævar Guðjónsson hjá ferðaþjónustunni á Mjóeyri við Eskifjörð. Árið 2022 fékk hátíðin veglegan styrk sem nýttur hefur verið til að koma henni almennilega á koppinn. Sævar segir mikla viðurkenningu fólgna í stuðningi Uppbyggingarsjóðsins.
Hátíðin var haldin í þriðja sinn sl. vetur en hugmyndin er sú að vekja athygli skíða- og brettaáhugafólks, sem kýs að renna sér utan hefðbundinna skíðasvæða, á vetrarparadísinni Austurlandi. „Í mínum huga er hátíðin góð viðbót við að koma landshlutanum okkar á kortið yfir veturinn því þetta er ekki bara útivistarhátíð,“ segir Sævar. „Hún kallar líka á menningartengda viðburði ferðamanninum til afþreyingar þannig að hátíðin sameinar útivist og menningu og tengir saman gesti og heimafólk.“
Sævar segir að styrkurinn frá Uppbyggðarsjóði hafi skipt miklu. „Fyrir utan það að styrkurinn hjálpar okkur að markaðssetja Austurland sem ákjósanlegan vetrarviðkomustað hefur hann gefið okkur tækifæri til að gera þetta almennilega frá upphafi. Eins og við vitum eru það oft litlu aðilarnir sem eru að prófa sig áfram með nýjar vörur, þjónustu eða þess vegna ákveðna hugsun, en hafa kannski ekki bolmagn til að gera hlutina eins vel og þeir gjarnan vildu fyrstu árin. Fyrir slíka aðila og slík verkefni er svona stuðningur mjög mikilvægur.“
Sævar hefur með Ferðafélagi Fjarðamanna staðið fyrir öðrum útivistarviðburði sem vakið hefur athygli landsmanna en það er gönguvikan „Á fætur í Fjarðabyggð“ sem fer fram síðustu vikuna í júní en þar er lögð áhersla á fjölbreyttar gönguleiðir við allra hæfi. „Austurland Freeride Festival er umfangsmeira og flóknara verkefni,“ segir Sævar. „Þetta er annað en að fara með fólk í gönguferð að sumarlagi þótt það geti verið áskorun líka. Það fylgir því sérstaklega mikil ábyrgð að beina fólki til fjalla á Austurlandi um miðjan vetur og þetta kallar á að við grandskoðum aðstæður gaumgæfilega og það gerum við m.a. með hjálp sérfræðinga sem við höfum þurft að sækja út fyrir Austurland. Við höfum líka náð okkur í menntun út fyrir landshlutann t.d. í snjóflóðaleit. En við viljum gera þetta almennilega svo hátíðin njóti trausts og virðingar skíða- og brettafólks og það kostar tíma, peninga og fyrirhöfn. Ég held að við getum alveg verið stolt af hversu vel allt hefur gengið fyrir sig frá upphafi. Engin áföll né vandræði heldur eiginlega þvert á móti. Gestir okkar hafa verið afar sáttir og skemmt sér frá morgni til kvölds.“
Sævar vonar að hátíðin muni hægt og rólega verða sjálfbær og snúast um ýmislegt fleira en skíða- og brettamennsku. „Þetta á tíminn eftir að leiða í ljós,“ segir hann. „Gönguvikan hefur notið stuðnings frá nærsamfélaginu en það tók tíma. Til að eins fari með Austurland Freeride Festival þarf hátíðin að festa sig í sessi og sanna sig gagnvart nærumhverfinu. Til að byrja með getur svona verkefni ekki verið sjálfbært og þá kemur styrkur frá Uppbyggingarsjóði sér vel og um leið er hann viss viðurkenning á hugmyndinni og/eða verkefninu. Þegar þú færð styrk er um leið verið að segja: „Við höfum trú á þér og hugmyndinni þinni,“ sem er afar gott veganesti fyrir alla frumkvöðla og getur verið mjög þýðingarmikið þegar sótt er um í aðra sjóði,“ segir Sævar hjá Ferðaþjónustunni Mjóeyri.
Við minnum á vinnustofur Uppbyggingarsjóðs Austurlands sem nú eru í gangi en þar veitir starfsfólk Austurbrúar ráðgjöf í gerð umsókna. Þá minnum við á hlaðvarpsþátt á Austurland hlaðvarp þar sem verkefnastjórar Uppbyggingarsjóðs Austurlands, þær Tinna Halldórsdóttir og Signý Ormarsdóttir, ræða m.a. um mikilvægi vandaðra umsókna.
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn