Sumarsýning Sláturhússins á Egilsstöðum hefur verið árlegur viðburður frá árinu 2009 og hafa að meðaltali fimm þúsund gestir sótt hverja sýningu. Það má því segja að sumarsýningin sé orðin mikilvægur þáttur í lista- og menningarlífi staðarins.

Að þessu sinni stendur SAM-félagið, grasrótarsamtök skapandi fólks á Austurlandi, fyrir sýningunni og útgangspunkturinn í ár er hönnun og listhandverk með vísan í menningu svæðisins og staðbundin hráefni.

Sýningin er tvíþætt og sýnir annars vegar afrakstur úr hönnunarverkefninu Designs from Nowhere sem fram fór á Austurlandi 2013 til 2014 og hins vegar samsýningu félaga í SAM-félaginu. Samtökin eru ört vaxandi afl á Austurlandi og vinna í alþjóðlegu samstarfi við að tengja saman ólíka þekkingu og reynslu sem leitt getur til nýsköpunar á sviði skapandi greina.

Sýningin stendur til 10.ágúst og er opin alla virka daga frá 18 til 22 og laugardaga frá 13 til 17.