Alls bárust 126 umsóknir sem eru nokkuð fleiri umsóknir en á síðasta ári. Áætlaður heildarkostnaður verkefna var um 560 m.kr. en sótt var um styrki fyrir 193 m.kr, þar af 82 m.kr. til menningarmála og 111 m.kr. til nýsköpunar og atvinnuþróunar.

Til úthlutunar að þessu sinni voru 57.800.000 kr. og skiptist fjármagnið þannig að 34 verkefni á sviði menningar hlutu styrki sem námu 25,8 milljónum og 27 styrkir til atvinnuþróunar upp á alls 24 milljónir. Að auki voru veittar 7,9 milljónir til stofn- og rekstarstyrkja á sviði menningar.

Mikill fjölbreytileiki er í verkefnunum eins og áður. Í ár var sérstaklega kallað eftir verkefnum sem tengdust áherslum nýrrar Sóknaráætlunar Austurlands sem snúa að málum á sviði menningar og atvinnuþróunar auk tengingar við umhverfismál. Áherslurnar felast í stuðningi við menningarverkefni sem styrkja atvinnustarfsemi á sviði lista og menningar, verkefni sem styðja við menningarstarf barna og ungmenna og verkefni sem draga fram og efla áhugaverða þætti í menningararfleifð. Áherslur sóknaráætlunar snúa einnig að því að styðja við og efla nýsköpun og frumkvöðlastarfsemi, verkefni sem fela í sér skref að aukinni sjálfbærni og fullvinnslu á Austurlandi þá sérstaklega úr skógarafurðum og á sviði matvælaframleiðslu sem og verkefni sem ríma við hugmyndafræði Áfangastaðarins Austurlands.

Hæstu styrkina í ár hlutu Sinfóníuhljómsveit Austurlands og Tandrabretti ehf, 3,5 milljónir samtals hvor aðili. Hæsta styrk einstaklings hlutu annars vegar Alona Perepelytsia, 2 milljónir fyrir verkefni sitt um Dansskóla Austurlands og Þór Tulinius fyrir verkefni sitt Sunnefa – leiksýning.