BRAS, nýstofnuð menningarhátíð barna og ungmenna á Austurlandi, verður sett á morgun, laugardaginn 8. september, á þremur stöðum á Austurlandi. Allan september verður fjölbreytt dagskrá í samstarfi við stofnanir, leik-, grunn- og framhaldsskóla á Austurlandi. Slagorð BRAS og leiðarljós er Þora! Vera! Gera!

BRAS – menningarhátíð barna og ungmenna á Austurlandi verður sett á morgun á Seyðisfirði, Fljótsdalshéraði og í Fjarðabyggð. Í kjölfarið fylgir fjölbreytt dagskrá með vinnusmiðjum, leiksýningum, tónleikum og myndlistarsýningum sem standa út mánuðinn. Í vikunni hafa verið starfandi listasmiðjur í grunnskólum í Fjarðabyggð og munu gestir á opnunarhátíð BRAS geta virt afrakstur þeirra fyrir sér. Í næstu viku verða listasmiðjur á Fljótsdalshéraði. 

Það er Austurbrú sem hefur umsjón með verkefninu í samstarfi við Skólaskrifstofu Austurlands og menningarmiðstöðvarnar á Austurlandi; Skaftfell, Menningarmiðstöð Fljótsdalshéraðs/Sláturhúsið, Menningarstofa Fjarðabyggðar og Tónlistamiðstöð Austurlands. Hátíðin er í samræmi við aukna áherslu sveitarfélaga á Austurlandi um að efla menningu fyrir börn og unglinga en t.a.m. hafa sveitarfélögin Fjarðabyggð og Fljótsdalshérað unnið menningarstefnu þar sem m.a. er kveðið á um eflingu barnamenningar.

Mikill áhugi á barnamenningarhátíð

Aðdragandi hátíðarinnar er nokkur. Signý Ormarsdóttir, verkefnastjóri hjá Austurbrú, segir að Austurbrú ásamt menningarmiðstöðvunum, Skólaskrifstofu Austurlands og sveitarfélögunum Fljótsdalshéraði og Fjarðabyggð hafi byrjað undirbúning fyrir um ári síðan. Austurbrú hafi svo haldið málþing sl. vetur sem kallað var Kúltiveraðir krakkar og þar kom fram mikill áhugi á því að halda hátíð fyrir börn og ungmenni á Austurlandi líkt og gert er í nokkrum sveitarfélögum. Þar hefur barnamenningarhátíð Reykjavíkur verið mest áberandi síðustu ár en þetta mun vera fyrsta menningarhátíð barna- og ungmenna sem haldin er í heilum landshluta.

Þýðingarmikil hátíð

Með fjórðu iðnbyltingunni og breytingum í kjölfar hennar er mikilvægt að börn læri skapandi hugsun og kynnist listum og menningu út frá sem víðustu sjónarhorni. Er það von aðstandenda BRAS að hátíðin muni með tíð og tíma auka möguleika barna til uppgötvunar á eigin listrænum hæfileikum og þannig auka getu þeirra til að takast á við breytingar í samfélaginu. Slagorð hátíðarinnar – Þora! Vera! Gera! – er m.a. skírskotun í þetta. Að hvetja börn til að þróa með sér skapandi hugsun.

Hátíðin er áhersluverkefni Sóknaráætlunar Austurlands en er líka fjármögnuð með styrkjum frá sveitarfélögum og fyrirtækjum á Austurlandi.

Sem fyrr segir er þetta í fyrsta sinn sem hátíðin er haldin og verður hún sett á morgun á Fljótsdalshéraði, Seyðisfirði og Fjarðabyggð. Meðal þess sem gestir munu sjá og upplifa eru tónlistaratriði með ungum Seyðfirðingum, Gunnar Helgason, rithöfundur, kynnir uppákomur þar sem börn eru í aðalhlutverki og danspartí. Þá mun tónlistarmaðurinn Daði Freyr vera í beinni frá Reykjavík, taka lagið og semja tónlist.

Sjá dagskrá BRAS á morgun og heildardagskrá.

Nánari upplýsingar um BRAS veitir Signý Ormarsdóttir, verkefnastjóri hjá Austurbrú, í síma 470 3800 og 8602983.