Alls bárust 142 umsóknir í Uppbyggingarsjóð Austurlands sem auglýsti í fyrsta skipti eftir umsóknum í síðasta mánuði. Svo mikill var áhuginn á sjóðnum að heimasíða Austurbrúar lá niðri um tíma vegna mikillar umferðar en það hefur aldrei áður gerst í sögu Austurbrúar.

Úthlutað verður um 60 milljónum króna í menningar- og nýsköpunarverkefni og segir Signý Ormarsdóttir, verkefnastjóri sjóðsins, að margar góðar umsóknir hafi skilað sér þrátt fyrir að umsóknarfresturinn hafi verið knappur.

„Það er greinileg gróska í menningar- og nýsköpunargeiranum og það verður spennandi að sjá hvaða verkefni fá styrk,“ segir hún en fljótlega eftir að umsóknarfresturinn rann út þann 12. apríl hófst vinna við að fara yfir umsóknirnar sem eru, eins og fyrr segir, 142 talsins og áhugi fólks svo mikill dagana rétt áður en umsóknarfresturinn rann út að tölvukerfið lá niðri um tíma en sem betur fer var leyst úr því snarlega.  

Stjórn Sambands sveitarfélaga á Austurlandi skipaði tvö fagráð sem fara yfir umsóknirnar og síðan sérstaka úthlutunarnefnd sem tekur við þeim umsóknum sem fagráðin mæla með (sjá samþykktir stjórnar SSA um fagráðin og úthlutunarnefnd hér). Í fagráði menningar sitja Þór Vigfússon (formaður), Elsa Guðný Björgvinsdóttir, Hildur Þórðardóttir, Svandís Egilsdóttir og Ingvi Örn Þorsteinsson. Í fagráði atvinnu- og nýsköpunar sitja Ásta Kristín Sigurjónsdóttir (formaður), Magnús Þór Róbertsson, Páll Baldursson, Skúli Björnsson og Sóley Dögg Birgisdóttir. Í úthlutunarnefnd eru formenn fagráðanna auk Hafliða Hafliðasonar sem gegnir formannshlutverki í úthlutnarnefnd.

Ekki liggur endanlega fyrir hvenær úthlutað verður úr sjóðnum en stefnt er að úthlutun fyrir miðjan maí.