Tveir nýir verkefnastjórar
Gengið hefur verið frá ráðningu tveggja nýja verkefnastjóra hjá Austurbrú.
Brothættar byggðir
Gengið hefur verið frá ráðningu Valborgar Aspar Warén sem verkefnisstjóra Brothættra byggða á Stöðvarfirði. Vallý, eins og hún er kölluð, er með BA-próf í stjórnmálafræði og menntun í margmiðlunarhönnun frá NoMa í Danmörku. Síðustu ár hefur hún aðallega starfað í fjármálageiranum og síðan 2020 hjá alþjóðlega fjártæknifyrirtækinu Rapyd Europe.
Vallý er alin upp á Egilsstöðum en ættuð frá Eskifirði og Finnlandi. Hún hefur búið í Garðabæ síðan 2012, á tvö börn en mun flytja austur á Stöðvarfjörð innan tíðar. Hún hefur mikinn áhuga á stjórnmálum og hefur tekið virkan þátt í sveitarstjórnmálum í Garðabæ. Þá hefur hún áhuga á hjólreiðum og alls konar útivist, s.s. kajakróðri og fjallgöngum.
Vallý hefur störf í sumar.
Atvinnu- og byggðaþróun
Páll Baldursson hefur tekið til starfa sem ráðgjafi í atvinnuþróunar- og byggðamálum. Palli, eins og hann er jafnan kallaður, er með BA-próf í sagnfræði og próf í forystu og stjórnun frá Bifröst. Síðustu ár hefur hann starfað sem viðskiptastjóri fyrirtækja hjá Arion banka á Austurlandi. Áður var hann sveitarstjóri Breiðdalshrepps í átta ár, kynnist þá vel atvinnu- og byggðaþróun á Austurlandi og tók þá þátt í fjölmörgum sameiginlegum verkefnum sveitarfélaga á Austurlandi.
Palli er búsettur á Egilsstöðum en fæddur og uppalinn á Breiðdalsvík. Eiginkona hans er hjúkrunarfræðingur og saman eiga þau tvíbura á unglingsaldri.
Helstu áhugamál Palla eru samfélagsmál, sagnfræði og útivist og þá helst hlaup og sérstaklega utanvegahlaup.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
