Tíu sprotafyrirtæki hafa verið valin til þátttöku í viðskiptahraðlinum Til sjávar og sveita – frá hugmynd í hillu, sem leggur áherslu á sjálfbærar lausnir í landbúnaði og sjávarútvegi, þar af tvö frá Austurlandi. 

Yfir sjötíu umsóknir bárust í hraðalinn sem fer fram í annað sinn nú í haust. Markmiðið er hvetja til aukinnar nýsköpunar í þessum grunnatvinnugreinum þjóðarinnar og aðstoða frumkvöðla við að byggja upp næstu kynslóð fyrirtækja með því að veita þeim faglega undirstöðu og hraða ferlinu frá því að hugmynd kviknar þar til viðskipti taka að blómstra. 

Austfirsku fyrirtækin sem taka þátt eru: 

Nielsen Restaurant – Framleiðir salatolíur úr vannýttum íslenskum villtum jurtum

Sauðagull – Vinnur matarafurðir úr íslenskri sauðamjólk 

Icelandic Startups hefur umsjón með hraðlinum í samstarfi við Íslenska sjávarklasann og er verkefnið styrkt af Matarauði Íslands, Nettó og Landbúnaðarklasanum. Þau fyrirtæki sem valin eru til þátttöku fá tækifæri til að vinna að hugmyndum sínum undir leiðsögn sérfræðinga í tíu vikur og aðgang að breiðu tengslaneti mentora.

Frétt: Viðskiptablaðið