Úrsúla Manda Ármanndóttir er nýr starfsmaður hjá Austurbrú. Starf hennar snýst um að mynda og viðhalda tengslum við atvinnulífið á Austurlandi og veita ráðgjöf varðandi fræðslu og endurmenntun.
Hún mun m.a. aðstoða fyrirtæki við að meta fræðsluþarfir, kynna tækifærin sem atvinnulífinu stendur til boða þegar kemur að sí- og endurmenntun. Þá mun Úrsúla jafnframt hafa umsjón með samstarfsverkefninu Fjölmennt sem er yfirskrift verkefnis hvers tilgangur er að skipuleggja námskeið og aðra fræðslu fyrir fólk með fötlun á Austurlandi.
Úrsúla hefur lokið námi í lyfjatækni og grunnskólakennarafræði og hefur á starfsferli sínum unnið ýmis konar störf m.a. í þjónustu, markaðsmálum og við kennslu. Hún er fjörutíu og fjögurra ára gömul, fædd og uppalin í Neskaupstað þar sem hún býr í dag en hún hefur á síðustu árum einnig dvalið um lengri tíma erlendis, nánar tiltekið í Danmörku og Bandaríkjunum.
Hún á eiginmann og tvö börn og í tómstundum ferðast hún, prjónar, les og nýtur samvista með fjölskyldu og vinum.
Úrsúla verður með starfsstöð í Neskaupstað og við bjóðum hana hjartanlega velkomna til starfa!
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn