Nýlega lauk svonefndum 60+ námskeiðum hjá Austurbrú. Markmið þeirra er að auka tæknilæsi fólks 60 ára og eldri.

Námskeiðin nutu styrks frá félagsmálaráðuneytinu. Kennd voru tíu námskeið á tíu stöðum og var þátttaka mjög góð en alls voru 67 þátttakendur skráðir og meðalaldurinn liðlega sjötugt. Markmiðið var að vekja áhuga nemenda á því sem tæknin hefur upp á að bjóða og auka sjálfstraust þeirra og þekkingu í notkun tölva og ýmis konar snjalltækja.

Að sögn Þorbjargar Ólafar Jónsdóttur, verkefnastjóra Austurbrúar, sem hafði umsjón með námskeiðunum voru þátttakendur ánægðir með námskeiðin. Þau hafi verið persónuleg og lausnamiðuð, nemendur hafi lært ýmislegt sem þeir vissu ekki áður, skilningur á allskyns smáforritum aukist en umfram allt hafi sjálfstraust til að prófa sig áfram í símum og spjaldtölvum eflst.

Nánari upplýsingar um námskeið á vegum Austurbrúar má finna hér.