„Við getum gert svo magnaða hluti saman“
Undirritun Svæðisskipulags Austurlands 2022-2044 þann 12. október var lokahnykkurinn á ferli sem hófst árið 2016. Eydís Ásbjörnsdóttir er varaformaður svæðisskipulagsnefndar SSA og hefur verið með í vinnunni frá upphafi.
„Þetta er gríðarstór dagur fyrir Austurland,“ sagði hún að lokinni athöfn í húsakynnum Skipulagsstofnunar sl. miðvikudag þar sem Svæðisskipulag Austurlands 2022-2044 var undirritað. „Ég er bæði þakklát og sátt og mér líst auðvitað mjög vel á endanlegt plagg. Núna hefst vinna við að fræða fólk, fyrirtæki og stofnanir á Austurlandi um innihald skipulagsins.“
Eydís segir það hafa mikla þýðingu að hafa skýra stefnu inn í framtíðina. „Í svæðisskipulaginu er að finna skýra stefnumörkun og leiðir til að takast á við þær áskoranir sem Austurland og raunar heimurinn stendur frammi fyrir. Í svæðisskipulaginu er verið að benda á leiðir til að styrkja mannauð, fyrirtæki og stofnanir í landshlutanum. Við erum líka að horfa til umhverfis- og skipulagsmála, lýðræðis, velferðar, menntunar, öryggis og heilsu. Þetta plagg tekur á öllum helstu samfélagsþáttunum og er mjög mikilvægt verkfæri til að efla samvinnu á svæðinu. Við getum gert svo magnaða hluti saman.“
Aðkallandi verkefni
Sem fyrr segir hefur Eydís verið með í þessari vinnu frá upphafi. Þegar hún lítur til baka segir hún verkefnið hafa verið aðkallandi. „Við þurfum alltaf að horfa til framtíðar,“ segir hún. „Í náinni framtíð stöndum við frammi fyrir áskorunum sem kalla á að við styrkjum innviði á svæðinu og mín skoðun er sú að farsælast sé fyrir okkur á Austurlandi að standa saman. Og núna er það okkar að horfa til svæðisskipulagsins og vinna eftir því. Ef það er gert vel og skipulega sé ég bara góða hluti koma út úr þessari vinnu.“
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
