Listaverkagjöf Sigurðar Guðmundssonar
Ars longa, nýstofnuðu alþjóðlegu samtímalistasafni á Djúpavogi, hefur borist listaverkagjöf tuttugu og sjö listaverka eftir myndlistarmanninn Sigurð Guðmundsson. Öll verkin má finna á sýningu Sigurðar, Alheimurinn er ljóð, sem opnuð var í Bræðslunni á Djúpavogi 10. júlí og stendur til 15. ágúst eða sunnudaginn næstkomandi. Þess má geta að hið nýja listasafn er eitt fjölmargra metnaðarfullra menningarverkefna sem Uppbyggingarsjóður Austurlands hefur styrkt í gegnum tíðina.
Stærsta safneign af verkum Sigurðar
Öll verkin má finna á sýningu Sigurðar, Alheimurinn er ljóð, sem opnuð var í Bræðslunni á Djúpavogi 10. júlí og stendur til 15. ágúst eða næstkomandi sunnudag. Sýningin er sú síðasta sem haldin er í Bræðslunni eftir átta ára samfellt sýningarhald.
Verkin sem tilheyra listaverkagjöf Sigurðar spanna meira en 50 ára tímabil af ferli hans. Samanlagt verðmat verkanna eru rúmar 125 milljónir króna eða rúmlega ein milljón Bandaríkjadala. Ars longa samtímalistasafn hefur því eignast stærstu safneign af verkum Sigurðar á landsvísu og mörg þeirra talin lykilverk í ferli listamannsins. Aðeins Stedelijk Museum í Amsterdam á stærri safneign af verkum Sigurðar sem á fimmtíu og sjö verk eftir hann.
Sigurður Guðmundsson, sem er ásamt Þór Vigfússyni stofnandi hins nýja safns, segist vona að innan fárra ára verði þessi safneign orðin lítil innan um ný aðföng af listaverkum eftir samtímalistamenn jafnt erlendra sem íslenskra listamanna.
Alheimurinn er ljóð
Sýning Sigurðar Guðmundssonar Alheimurinn er ljóð, sem staðið hefur í sumar, samanstendur af ólíkum verkum frá árunum 1969–2021. Ferill Sigurðar er fjölbreyttur og miðlarnir ólíkir en póetískur tónn hefur umvafið verk hans alla tíð, hvort sem um er að ræða ljósmyndaverk, höggmyndir, teikningar, grafíkverk eða gjörninga hans, en hann hefur einnig samið tónverk, ljóð og gefið út fjórar skáldsögur.
Alþjóðlegt samtímalistasafn
Markmið með stofnun safns fyrir alþjóðlega myndlist á Djúpavogi er að safna og varðveita listaverkaeign eftir íslenska og alþjóðlega listamenn, vera leiðandi vettvangur alþjóðlegrar samtímalistar á Íslandi og efla tengsl og samvinnu við listamenn og aðra fagaðila á alþjóðavísu með metnaðarfullu sýningarhaldi. Sjálfstætt safn fyrir alþjóðlega samtímalist á Djúpavogi á sér ekki hliðstæðu hér á landi og safnið hlaut veglegan styrk frá Uppbyggingarsjóði Austurlands við síðustu úthlutun sjóðsins í desember 2020.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
