Dagarnir 16.-18. janúar 2024 verða helgaðir ferðaþjónustu en þá munu markaðsstofur landshlutanna, Íslenski ferðaklasinn, Samtök ferðaþjónustunnar, Ferðamálastofa og Íslandsstofa hleypa af stokkunum Ferðaþjónustuvikunni. Lögð verður áhersla á að auka vitund um mikilvægi ferðaþjónustu og efla samstarf og fagmennsku í greininni með fróðlegri og skemmtilegri dagskrá.

Fyrir okkur Austfirðinga ber hæst annars vegar ferðakaupstefnan Mannamót en aldrei hafa jafn mörg austfirsk fyrirtæki skráð sig eins og við sögðum frá á dögunum. Hins vegar er það hraðallinn Straumhvörf sem Austurbrú og Markaðsstofa Norðurlands standa að. Þetta er vöruþróunarverkefni í ferðaþjónustu sem nær yfir allt Norður- og Austurland og er ætlað fyrirtækjum í ferðaþjónustu og fulltrúum sveitarfélaga. Tilgangurinn er að nýta tækifæri sem felast í auknu millilandaflugi til Norður- og Austurlands og búa til nýjar vörur og vörupakka í ferðaþjónustu. Tæplega 50 fyrirtæki í ferðaþjónustu, þar af rétt rúmlega 20 austfirsk, tóku þátt í Straumhvörfum (verkefnið hófst í haust), og núna í Ferðaþjónustuvikunni hyggjast átta þeirra kynna nýjungar í framboði á afþreyingu og gistingu, þar af eru fimm af Austurlandi.

Við munum flytja nánari fréttir af Mannamótum og Straumhvörfum seinna í vikunni!