Orkuskot – Fundarröð um orku á mannamáli
Austurbrú stendur í haust fyrir fundaröðinni Orkuskot, sem er hluti af Eyglóarverkefni stofnunarinnar. Alls verða haldnir fimm fundir víðs vegar um Austurland frá september og fram í nóvember þar sem ólík orkutengd málefni verða tekin fyrir á mannamáli.
Markmiðið með Orkuskotum er að gera upplýsingar um orkumál aðgengilegar og hagnýtar og skapa um leið vettvang þar sem íbúar geta rætt við sérfræðinga og fengið svör við spurningum sínum. Orkuskot byggja á þeirri fræðslu og samtali um orkumál sem Austurbrú hefur staðið fyrir undanfarin misseri. Þar á meðal var fundaröðin Hlýtt heimili, þar sem fjallað var um húshitun, orkunýtni, varmadælur og styrktækifæri fyrir heimili á Austurlandi. Fundirnir voru vel sóttir og sköpuðu líflegar umræður og fjölmargar spurningar frá íbúum.
Fyrirhugað er að fjalla meðal annars um hvernig lesa megi úr rafmagnsreikningnum, orkuöflun og orkusjálfstæði, orkuskipti í bílasamgöngum og þriggja fasa rafmagn. Efni fimmta fundarins verður kynnt síðar.
Fimm fundir víðs vegar um Austurland
Fundirnir verða haldnir 1. september, 22. september, 13. október, 3. nóvember og 24. nóvember á mismunandi stöðum á Austurlandi. Nákvæmar tímasetningar, staðsetningar og fyrirlesarar verða kynnt eftir því sem nær dregur hverjum fundi.
„Við viljum með Orkuskotum taka fyrir orkumál sem snerta daglegt líf fólks og ræða þau á mannamáli. Það er líka mikilvægt að fólk geti komið með sínar spurningar og fengið svör frá sérfræðingum. Ég hvet því Austfirðinga til að fylgjast með dagskránni og mæta á Orkuskot í sínu nágrenni,“ segir Hrafnkatla Eiríksdóttir, verkefnastjóri Eyglóar hjá Austurbrú.
Fundurinn kemur líka heim til þín
Þeir sem ekki komast á fundina geta fylgst með efninu síðar. Erindi hvers Orkuskots verður tekið upp og birt á YouTube-síðu Austurbrúar um viku eftir fundinn.
Samhliða verður birt „Spurt og svarað“ á vef Austurbrúar þar sem teknar verða saman helstu spurningar sem koma upp á fundinum og svör við þeim. Þannig nýtist efnið áfram og verður aðgengilegt þeim sem vilja kynna sér viðfangsefni fundanna síðar.
Fyrsta Orkuskot haustsins verður 1. september og verður nánari dagskrá þess kynnt fljótlega.
Fleiri fréttir
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn
