Erna Rakel Baldvinsdóttir er nýr starfsmaður hjá Austurbrú. Hennar helstu verkefni snúa að rannsóknum og greiningu m.a. athugun á Loftbrúnni og rannsókn á brottflutningi kvenna af Austurlandi.
Sagt var frá því nýlega á þessari síðu að Austurbrú hefði fengið styrk til að rannsaka Loftbrúnna, úrræði sem veitir lægri flugfargjöld fyrir íbúa landsbyggðarinnar til og frá höfuðborgarsvæðinu. Erna mun hafa umsjón með rannsókninni en um er að ræða heildstæða úttekt þar sem skoðuð verða öll gögn er aðgengileg eru um notendahópinn auk þess sem framkvæmd verður spurningakönnun meðal notenda af öllum svæðum. Verkefnið er unnið í samstarfi við Vegagerðina og landshlutasamtök sveitarfélaga auk fleiri aðila.
Erna segist gríðarlega spennt að takast á við verkefnið. Loftbrúin sé nýtt samgönguúrræði og upplýsingar um notkun þess séu mikilvæg gögn til að meta verkefnið. „Ég hef lengi haft áhuga á rannsóknarvinnu og það verður áskorun að vera með í framkvæmd rannsóknar frá upphafi til enda. Það er mikilvægt að hafa góð gögn til að þróa úrræðið frekar, meta næstu skref og hvernig sé best að uppfylla markmið þess eins og þau eru skilgreind í byggðaáætlun,“ segir Erna en spurningavagn verður settur í umferð á næstu dögum. Niðurstöður rannsóknarinnar munu liggja fyrir síðar á árinu.
Ásamt Loftbrúnni mun Erna einnig taka þátt í rannsókn á hringrásarhagkerfi Austurlands og á brottflutningi kvenna af Austurlandi.
Erna er þrítug, uppalin á Reyðarfirði en býr í dag á Egilsstöðum ásamt maka. Hún hefur unnið ýmis þjónustustörf, verið móttökuritari, framleiðslustarfsmaður í Fjarðaáli og nú síðast starfaði hún á rannsóknarstofu Fjarðaáls. Erna er með BA gráðu í félagsfræði og meistaragráðu í lýðheilsuvísindum. Áhugamálin hennar eru útivist, fjölskylda og vinir, alls konar handavinna og góður matur.
Við bjóðum Ernu hjartanlega velkomna til starfa!
Frá stofnun hefur Austurbrú unnið að fjölmörgum verkefnum á sviði menningar, markaðssetningar, atvinnuþróunar og fræðslu. Kynntu þér nýjustu tíðindin!
Skoða fréttasafn