Loftbrú veitir afsláttarkjör til þeirra sem eiga lögheimili á landsbyggðinni fjarri höfuðborgarsvæðinu og á eyjum. Undir Loftbrú falla Vestfirðir, hluti af Norðurlandi vestra, Norðurland eystra, Austurland, Hornafjörður og Vestmannaeyjar. Svæðið er afmarkað með tilliti til póstnúmera. Alls ná afsláttarkjör Loftbrúar til rúmlega sextíu þúsund íbúa á þessum svæðum.

Markmiðið með verkefninu er að bæta aðgengi íbúa á landsbyggðinni að miðlægri þjónustu og efla byggðir með því að gera innanlandsflug að hagkvæmari samgöngukosti. Afsláttarkjörin koma þeim til góða sem vilja nýta margvíslega þjónustu og afþreyingu á höfuðborgarsvæðinu og til að heimsækja ættingja og vini. Loftbrú er ætluð fólki í einkaerindum til höfuðborgarinnar en ekki fyrir ferðir í atvinnuskyni eða hefðbundnar vinnuferðir.

Loftbrú veitir fjörutíu prósent afslátt af heildarfargjaldi fyrir allar áætlunarleiðir innanlands til og frá höfuðborgarsvæðinu. Fullur afsláttur er veittur hvort sem valið er afsláttarfargjald eða fullt fargjald. Hver einstaklingur getur fengið lægri fargjöld fyrir allt að þrjár ferðir til og frá Reykjavík á ári (sex flugleggir). Út árið 2020 gilda afsláttarkjörin fyrir eina ferð til og frá Reykjavík (tveir flugleggir).

Til að nýta Loftbrú auðkennir fólk sig á Ísland.is með rafrænum skilríkjum og þeir sem eiga rétt á Loftbrú fá yfirlit yfir réttindi sín. Þeir sem vilja nýta afsláttinn sækja sérstakan afsláttarkóða sem notaður er á bókunarsíðum flugfélaga þegar flug í áætlunarflugi er pantað.

Verkefnið Loftbrú er hluti af stjórnarsáttmála ríkisstjórnarinnar um að efla innanlandsflug og byggja upp almenningssamgöngur um land allt. Verkefnið er hluti af samgönguáætlun 2020-2034 sem Alþingi samþykkti í júní 2020. Það hefur gjarnan verið nefnt „skoska leiðin“ þar sem það á fyrirmynd í vel heppnuðu kerfi sem Skotar hafa byggt upp í samstarfi ríkis og flugfélaga. Vegagerðin fer með umsjón og framkvæmd verkefnisins í samvinnu við samgöngu- og sveitarstjórnarráðuneytið og Stafrænt Ísland ber ábyrgð á uppbyggingu Ísland.is sem miðlægri þjónustugátt fyrir hið opinbera og er Loftbrú eitt þeirra verkefna.

Mikil lífskjaraaukning

Jóna Árný Þórðardóttir, framkvæmdastjóri Austurbrúar, er ein þeirra sem unnið hefur að verkefninu ötullega síðustu ár. Hún segir að dagurinn í dag sé mikill gleðidagur fyrir íbúa landsbyggðarinnar og raunar Íslendinga alla. „Þetta er mikilvægur áfangi í að auka lífsgæði íbúa sem búa fjarri þeirri þjónstu og því samfélagi sem höfuðborgin hefur upp á að bjóða,“ segir hún en Jóna fékk þann heiður að bóka fyrsta miðann og nota þannig Loftbrúnna fyrst Íslendinga.

„Þetta hefur verið langhlaup,“ segir Jóna en hún hóf máls á hinni svonefndu „skosku leið“ í pistli á fréttamiðlinum Austurfrétt á vormánuðum árið 2016. Pistillinn vakti mikla athygli en háværar umræður um kostnað á innanlandsflugi voru í samfélaginu á þessum tíma. Má sem dæmi taka Facebook-hópinn „Dýrt innanlandsflug“ þar sem fjöldi fólks tók þátt í samtali um þessi mál og kallaði eftir lausnum. „Skoska leiðin“ var ein slík lausn sem hlaut hljómgrunn hjá mörgum er tjáðu sig um þessi mál.

„Það er mikilvægt að gera eins og gert var í þessu tilfelli og horfa til reyndra lausna erlendis frá því Ísland er fráleitt eina landið sem býr við þessar aðstæður,“ segir Jóna Árný. „Það þarf ekki alltaf að finna upp hjólið og með tilkomu Loftbrúar erum við að nýta okkur góða reynslu Skota af þessari lausn. Þá reyndist það mikið happ að „skoska leiðin“ fékk liðsauka úr ýmsum áttum,“ segir hún en í kjölfar greinaskrifa Jónu Árnýjar tóku atvinnuþróunarfélög landshlutanna og Byggðastofnun sig saman og héldu málþing haustið 2017 undir yfirskriftinni „Innanlandsflug sem almenningssamgöngur“ þar sem „skoska leiðin“ var til umfjöllunar. Segja má að þannig hafi hugmynd að góðri lausn breiðst út og tóku margir þátt í umræðum um málið: Almennir borgarar, stjórnmálafólk og fólk víða úr samfélaginu.

Svo fór loks að „skoska leiðin“ rataði inn í stefnuskrá ríkisstjórnarinnar, þaðan í samgönguáætlun og í dag var Loftbrúin, eins og verkefnið heitir í dag, opnuð með athöfn á Egilsstaðaflugvelli í dag eins og fram hefur komið.

Jóna segir að um viss tímamót sé að ræða í samgöngumálum landsins. Þetta skipti ekki eingöngu íbúa landsbyggðarinnar máli heldur Íslendinga alla. „Það er mikilvægt fyrir landið allt að við Íslendingar eigum í sem mestum samskiptum og að allir geti notið þeirra gæða sem höfuðborgarsvæðið hefur upp á að bjóða. Þannig virkum við betur sem ein heild,“ segir Jóna Árný sem bindur miklar vonir við að langtímaáhrif Loftbrúarinnar verði heillavænleg fyrir land og þjóð. „Það er von mín að fólk verði duglegt að nýta þetta nýja úrræði og þeirrar fjölbreyttu þjónustu sem höfuðborg okkar allra hefur upp á að bjóða.“

• Nánar á vef Loftbrúar
• Fréttatilkynning frá samgöngu- og sveitarstjórnarráðuneytinu og Vegagerðinni